Коронавируст халдвараас сэргийлэхэд тустай хоолны дэглэмийн талаар Эрүүл мэндийн яамны хэлтсийн дарга Д.Нарангэрэл "Коронавируст халдвараас сэргийлэх нэг арга нь дархлаагаа дэмжиж, зөв хооллох явдал юм. Шингэний хэрэглээ сайн байх хэрэгтэй бөгөөд өдөрт 8-10 аяга халуун бүлээн ус уухыг зөвлөж байна. Ингэхдээ нимбэг, зөгийн бал, чацаргана, аньс, нэрс зэргийг хольж ууж болно.

Түүнчлэн чихрийн агууламж ихтэй зүйлсээс аль болох татгалзах мөн даршилсан халуун ногоотой бүтээгдэхүүнийг хэрэглэхгүй байх нь зөв. Өөх тосны хувьд ургамлын тос, оливын тос хэрэглэж, транс тосноос татгалзах хэрэгтэй. 

Мөн адууны мах, сонгино, саримс, хөмүүл зэргийг хэрэглэж, шөлтэй хоол идэх нь дархлааг дэмжихэд тустай. Бүхэл үрийн гурил нь дархлааг дэмжихэд тустай тул түлхүү хэрэглэхийг зөвлөж байна. Сүү, сүүн бүтээгдэхүүнийг ч аль болох халуунаар нь уувал дархлаа дэмжигдэх болно” гэлээ. 

Б.Баатар