Улсын онцгой комиссоос мэдээлэл хийж байна. УОК-ын хэвлэлийн төлөөлөгч Ц.Ганзориг “Бүх нийтийн хөл хорионы үр дүн, мэргэжлийн байгууллагуудын ажлын үр дүнгээс хамаарч дараах шийдвэр гарч байна. Нийтийн тээвэр энгийн горимоор буюу өглөө 06:00-22:00 цагийн хооронд үйлчилгээнд явуулахаар боллоо. Үүнийг хөл хорионы дэглэмийг сулруулж байна гэж ойлгож болохгүй. Цар тахлыг хумьсан тохиолдолд энгийн горим руу шилжинэ. Энгийн горим руу шилжих хоёроос гурван төлөвлөгөөг боловсруулж байна.

Мөн зайлшгүй ажиллах болон эмнэлгийн үйлчилгээ авах хүмүүс хувийн машинаар явуулах, хүнсний түгээлтийн бүртгэлтэй 5000 гаруй машиныг 07:00-17:00 цагийн хооронд явуулахаар боллоо. 

Бид өнөөдөр хөл хориог 87 хувиар хорьж чадлаа. Хэрэв 24 цагийн дотор барьж чадаагүй бол халдвар тархалт 10 хувиар нэмэгдэх магадлалтай байсан” гэлээ. 

Нийслэлийн Засаг даргын орлогч Ж.Сандагсүрэн "Засгийн газрын тогтоолд заасан 11 чиг үүргийн 13 төрлийн шалтгаантай иргэдэд үйлчлэхэд нийтийн тээврийн хэрэгсэл хүрэлцэхгүй байсан. Энэ хүмүүст зориулж нийтийн тээврийн хэрэгслийн үйлчилгээг нээж байна. Нийтийн тээврээр өдөрт 5 мянган хүн үйлчлүүлж байсан. Яг одоогоор 50 мянга гаруй иргэнд үйлчлэх шаардлага үүссэн. Аль болох өвчин халдварлах нөхцөлийг бууруулах зорилгыг бид эрхэм болгосон. 5 мянга гаруй хүнсний үйлдвэрлэл эхлэх тээврийн хэрэгслийг бүртгэлжүүлж дуусаад, хүнсний түгээлтийг 07:00-17:00 цагт хийнэ" гэв.

Б.Батчимэг