Нийтийн тээврийн хуваарийг 10 хоногт гурвантаа өөрчлөв

УОК-оос нийслэлд хатуу хөл хорио тогтоосонтой холбоотойгоор нийтийн тээврийн үйлчилгээний хуваарьт өөрчлөлт оруулж, өглөөний 06.00-10.00, оройн 17.00-22.00 буюу ажил эхлэх,тарах цагт явуулахаар зохицуулсан. Улмаар арваннэгдүгээр сарын 18-ны өдрөөс дахин өөрчилж, өглөөний 07.00-10.00, оройн 17.00-22.00 байхаар хугацааг нэг цагаар богиносгосон билээ.

Гэвч шийдвэрийг хэрэгжүүлж эхэлсний маргаашаас иргэд хэт их бөөгнөрөл үүсгэж, халдвар хамгааллын дэглэм алдагдаж байна гэх шүүмжлэл нийгэмд хүчтэй өрнөсөн. Энэ дагуу НОК-ын өчигдрийн хуралдаанаас нийтийн тээврийг eрдийн цагийн хуваариар явуулахаар болж, харин 13 салбарын ажилтнууд, эрүүл мэндийн үйлчилгээ авах иргэд нийтийн тээвэр болон хувийн автомашинаараа зорчих шийдвэр гаргасан билээ.

Автомашины зөвшөөрлийг хоёр хоногийн дараа цуцлав

Нийслэлд хатуу хөл хорио тогтоосонтой холбоотойгоор арванхоёрдугаар сарын 1-нийг хүртэл явган хүний болон автомашины хөдөлгөөнийг хориглосон. Харин нэр бүхий 13 байгууллагын ажилтан, албан хаагчдыг автомашины тусгай зөвшөөрлөөр зорчуулахаар болсон билээ. Энэ дагуу дээрх газруудаас нэрсийг нь авч автомашины тусгай зөвшөөрөл олгохоор болсон ч хуурамчаар үйлдэж эхэлсэн гэдэг шалтгаанаар хоёр хоногийн дараа зөвшөөрлийг цуцалснаас ихээхэн маргаан, шүүмжлэл дагуулсан билээ.

Хүнс түгээлтийг шөнийн бус өдрийн цагаар хийхээр өөрчлөв

Коронавирусний дотоодын халдвар нэмэгдсэнтэй холбоотойгоор УОК-оос шийдвэр гарч, арваннэгдүгээр сарын 18-ны өдрөөс хүнсний үйлдвэрлэл худалдаа түүн дотор супeрмаркeт, хайпeрмаркeт, минимаркeт, хүнсний дэлгүүр, бөөний төв, агуулах, хүнсний зах, эмийн сан, эм, эмийн хэрэгсэл ханган нийлүүлэх байгууллагууд бараа бүтээгдэхүүний тээвэрлэлт, ханган нийлүүлэлтийг 22.00-06.00 цагт хийхээр болсон билээ. Өдөржин ажилласан хүмүүс бараагаа авах гэж шөнөжин хүлээж, энэ хэрээр дархлаа нь суларч халдварт өртөх эрсдэл нэмэгдэж байна гэх шүүмжлэл худалдаа эрхлэгчдийн зүгээс тасраагүй. Тиймээс шийдвэрийг эргэн харж, арваннэгдүгээр сарын 21-нээс хүргэлтийн хугацааг өөрчилж, 06.00-22.00 цагийн хооронд болголоо.

У.Тэргэл