Засгийн газрын ээлжит бус хуралдаанаар Хууль зүйн сайд Х.Нямбаатарын сэтгүүлчдийн асуултад хэрхэн хариулсныг хөрвүүлэн хүргэe.

-Халдвар анх тархсан Энхсаран сувиллын үйл ажиллагааг өмнө зогсоож байсан гэсэн. Гэтэл яагаад үргэлжлүүлсэн юм бэ. Мөн таныг сувиллын эзэдтэй холбоотой гэсэн мэдээлэл тархсан?

-Өнгөрсөн гуравдугаар сард Энхсаран сувиллын үйл ажиллагааг зогсоосон. Мөн арваннэгдүгээр сарын эхээр үйл ажиллагааг нь зогсоох мэдэгдэл өгсөн байдаг. Шадар сайд үүссэн нөхцөл байдлыг, олон хүнийг эрсдэлд оруулсан асуудлыг хуулийн хүрээнд шалга гэсэн чиглэл өгсний дагуу хэрэг бүртгэлийн хэрэг нээх саналтайгаар прокурорт матeриалаа хүргүүлсэн. Одоогийн байдлаар арав гаруй хүн холбогдож байгаа. Прокуророос өнөөдөр хавтаст хэргийн дугаар өгмөгц эдгээр хүнийг нэг бүрчлэн дуудна. Сувилалд гаднаас эд зүйл оруулж худалддаг, бөөнөөрөө шууд бичлэг хийсэн нь тодорхой болж эхэлж байна. Цаашид эрүү үүсгэн шалгах байх.

Энхсаран сувиллын ард намайг байгаа тухай мэдээлсэн. Надад түрээсийн нэг өрөө ч байхгүй.

Би Сонгинохайрхан дүүрэгт 10 мянган хүнтэй хамт ажиллаж байсан. Тэдний хадам ээж болгонтой намайг холбоод байвал утгагүй юм болно. Бүх нийтийн бэлэн байдлын зэрэгт шилжсэн энэ цагт нэгнийгээ гүтгэхээс илүүтэй бодит мэдээллийг нийтлээсэй гэж хүсч байна.

-Төмөр зам олныг хамарсан үйл ажиллагаа зохион байгуулснаас халдварын голомт болсон. "Ковид-19"-ийн үeд хэрэгжүүлэх дэглэм хэвээр байсан шүү дээ?

-Голомтын нэг үүсвэр төмөр зам болсон. Хаана алдаа,эндэгдэл гарч олон хүнийг эрсдэлд оруулсныг тогтоохоор цагдаагийн байгууллага мөрдөн шалгах ажиллагааг эхлүүлээд байна.

-Нэг,хоёрдугаар хавьтлыг тогтоох гол ажлыг хүчний байгууллагынхан нугалж байгаа гэсэн. Хүн хүч ямар байгаа вэ?

Цагдаагийн байгууллага асар их ачаалалтай ажиллаж байна. Нэг, хоёрдугаар хавьтлыг тогтоох ажлыг тагнуул, мөрдөн байцаах албаны мөрдөгчид, Эрүүгийн цагдаагийн алба, цагдаа, дотоодын цэргийнхэн хийж байгаа. Улаанбаатар хотод өнөөдөр 6300 алба хаагч гурван ээлжээр дэглэм сахиулж байна. Мөн тагнуул, дотоодын цэргийн алба хаагчдыг боомтууд руу дэглэм сахиулахаар явуулж эхэлсэн.

-Цар тахлын энэ цагт хорих ангиудад эргэлт уулзалтыг хэрхэн зохицуулж байгаа вэ?

Нээлттэй, хаалттай хорих ангиудын эргэлт, уулзалтыг бүрмөсөн зогсоосон. Өнөөдрийн байдлаар, баривчлах байранд болон таслан сэргийлэх арга хэмжээ авахуулсан 6400 хүн байна.

У.Тэргэл