Төв аймгийн эрүүгийн хэргийн анхан шатны шүүхээс ТEГ-ын дарга асан Б.Хурц, прокурорын орлогч асан Г.Эрдэнэбат нарын зургаан хүнийг С.Зориг агсны амийг хөнөөсөн хэргээр ял авсан Т.Чимгээ, Б.Содномдаржаа нарыг эрүүдэн шүүж, гүйцэтгэх ажлын хууль тогтоомжийг зөрчсөн хэрэгт шүүсэн билээ.

Анхан шатны шүүхээс тэднийг эрүү шүүлт тулгасан гэм буруутайд тооцож, Б.Хурц, Г.Эрдэнэбат, Ж.Мөнхгал, С.Баяр нарт гурав, Н.Өлзийбаярт нэг жилийн хорих ял оноож, О.Бархасбадь, С.Эрдэнэбат нарыг цагаатгасан. Харин давж заалдах шатны шүүх хурал өнгөрсөн аравдугаар сарын 30-нд болж, хэргийг анхан шатны шүүх рүү буцаасан юм.

Харин Б.Хурц нарын зургаан хүнийг өчигдөр орой шүүхийн шийдвэрээр батлан даалтад гаргасан байна. Ялын 50 хувийг эдэлсэн, хүмүүжлийн алдаа гаргаагүй тохиолдолд шүүхээс батлан даалтад гаргах эрхтэй.

Мөн урьдчилан саатуулах байранд хоригдсон хугацааг нийт ялаас хасч тооцдог. Б.Хурц нарын хүмүүс хуулийн энэ боломжийг ашигласан бололтой.

У.Тэргэл