Дархан-Уул аймгийн Онцгой комиссоос хийсэн мэдээллийг хүргэе.

Аймгийн Онцгой комиссын дарга Б.Азжаргал “Энэ сарын 23-ны өдрийн байдлаар Дархан-Уул аймагт 1655 хүний шинжилгээ хийсэн. Түргэвчилсэн оношлуулаар 21324, PCR шинжилгээгээр 1076 иргэнд нийт 22051 иргнэд хийсэн. Эдгээрээс 20 иргэнээс халдвар илэрсэн. Халдвар нэмж бүртгэгдээгүй.

Халдвар авсан 20 иргэнтэй ойрын хавьтлын 344 иргэнийг есөн зочид буудалд хуваарилж, тусгаарлах ажил явагдаж байна. Мөн дам хавьтлын иргэдийг гэрээр тусгаарлаж байгаа.

УОК-ын шийдвэрээр маргаашнаас эхлэн аймгийн нийт өрх бүрээс нэг иргэн зарчмаар PCR-ийн шинжилгээнд хамруулахаар боллоо.

Эхний ээлжинд аймгийн төвийн 18 багийн өрхөд шинжилгээ хийхээр төлөвлөж байна. Аймгийн хэмжээнд 22 мянган өрх бий. Нэг хаалганы цаана хэдэн хүн, түрээслэгч байх нь чухал биш. Хамгийн гол нь тухайн гэр бүл өөрсдөө сонгож шинжилгээнд оруулна. Энэ иргэн нийгмийн харилцаанд хамгийн их оролцдог иргэн байна” гэлээ.

А.Сүх