11 дүгээр сарын 11-ний өдөр: Монгол Улсад коронавирусний анхны тохиолдол бүртгэгдэв

 

Монгол Улс коронавирусний халдварыг дотооддоо чухам хэзээ алдсан, үүний хариуцлагыг хэн хүлээх вэ. “Энхсаран” сувиллаар туг тахиад энэ асуудал намжих уу зэрэг олон асуулт хариултаа нэхэж эхэллээ. Улсын онцгой комиссоос 2020 оны 11 дүгээр сарын 11-ний өдөр Монгол Улс коронавирусний халдварыг дотооддоо алдсан болохыг албан ёсоор зарлаж, гамшгийн бэлэн байдлын зэрэгт шилжсэн.

Халдварыг “Энхсаран” сувилалд 21 хоног тусгаарлагдаад гарсан тээврийн жолооч “тараасан” гэгдэж буй. Харин тэрбээр сувиллаас гарахдаа халдвар авсан тул халдвар хамгааллын дэглэм алдсан “Энхсаран” сувиллын эздэд хэрэг үүсгэн шалгаж байгаа. Үүнтэй зэрэгцэн тус сувиллын ард ХЗДХ-ийн сайд Х.Нямбаатар байгаа гэх хардлага гараад амжсан. Харин сайд үүнийг үгүйсгэж, сувилал бүү хэл түрээсийн нэг өрөө байр ч байхгүй гэдгээ өчсөн байдаг.

11 дүгээр сарын 6-ны өдөр Төмөр замчдын тэмцээн болж, тус тэмцээнд оролцсон хүмүүс халдвар авсан нь батлагдав

Манай улсад коронавирусний халдвар тээврийн жолоочоос бус, Дархан, Сэлэнгээс эхлэлтэй, УОК халдварыг дотооддоо алдсанаа мэдээгүй байсан гэх хардлага олон нийтийн дунд хөвөрч эхэллээ. Тодотговол, Дорноговь, Говьсүмбэр, Дархан, Сэлэнгийн халдвар авсан иргэд нь нэг голомтоос халдварласан гэдгийг албаныхан онцолдог. Харин дээрх иргэд нь Дархан-Уул аймагт зохиогдсон төмөр замчдын тэмцээнд оролцсон нэг багийн хүмүүс гэгдэж буй. “Дархан өртөө” байгуулагдсаны 70 жилийн ойд зориулан төмөр замчдын тэмцээн нь 11 дүгээр сарын 6-ны өдөр зохион байгуулагдсан. Үүнээс үзэхэд Дархан, Сэлэнгэд халдвар аль эрт алдагдсан болж таарч байна.

Сэлэнгэ аймгийн голомт анх хаанаас халдвар авсан болох нь одоогоор тодорхойгүй байгаа. Улсын онцгой комиссын мэдээлж буйгаар Сэлэнгэ аймагтай хил залгаа ОХУ-ын мужид коронавирусний халдвар эрчимтэй тархаж байгаа учир ямар ч хэлбэрээр халдвар авсан байх магадлалтай гэх бүрхэг тайлбарыг хийгээд өнгөрсөн.

Ямартай ч ЭМЯ-наас өгч буй мэдээлэл зэргээс харахад манай улсад коронавирусний халдвар Улаанбаатараас бус Сэлэнгэ аймгаас эхлэлтэй болж байна. Үүнийг ч доорх тоон мэдээлэл гэрчилж байх шиг. 11 дүгээр сарын 24-ний өдрийн коронавируст халдварын нөхцөл байдлын мэдээгээр Улаанбаатарт 54, Сэлэнгэ аймагт 124, Дархан-Уул аймагт 20, Говьсүмбэр аймагт 3, Орхон аймагт 17, Дорноговь аймагт 17 тохиолдол бүртгэгдээд байгаа юм.