Ерөнхийлөгч Х.Баттулга 2021 оны төсвийн тухай хууль болон түүнийг дагалдан батлагдсан хуулиудад бүхэлд нь хориг тавилаа. Ерөнхийлөгчийн саналаас татгалзсан МАН-д өгч буй хариу цохилт ч гэж хэлж болох юм.

Тодруулбал, Ерөнхийлөгч Х.Баттулга цар тахлыг үед аж ахуйн нэгж, иргэдээ дэмжсэн бодлого явуулахын сацуу хүнд нөхцөлд иргэддээ 200 мянган төгрөг бэлнээр санаачилж, архи, тамхинаас бусдыг худалдаж авах боломжтотй 800 мянган төгрөгийн эрхийн бичиг тараах санал оруулсан ч МАН хүлээн авах боломжгүй гэж үзсэн.

МАН-ын татгалзсан нь ч учиртай байж мэднэ. Учир нь цар тахлын нөхцөлд иргэдийн орлого саатсан, хүндэрсэн нөхцөлд Ерөнхийлөгчийн гаргасан эл санаа олон түмний таалалд нийцсэн нь гарцаагүй.

Хүнд үед иргэддээ дэмжлэг үзүүлэх шийдвэр гаргаж, дэмжүүлж чадсан гээд ирэх оны Ерөнхийлөгчийн сонгуульд оноо авах нь тодорхой учраас МАН татгалзсан ч байж мэднэ.  

Аль нь ч байлаа гэсэн "миний саналыг дэмжихгүй бол зүгээр суухгүй" гэдгээ л төөсвийн хоригоор ийн харууллаа. Ингэхдээ УИХ-ын гишүүд ард иргэдийн амь нас, эрүүл мэндийг хамгаалахад амин чухлаар хүлээгдэж байгаа вакцины тухай мэдсээр байж гарсан даруйд нь худалдаж авах хөрөнгийг төсөвт тусгалгүй, гадны зээл тусламжаар шийдвэрлэнэ гэсэн хоосон мөрөөдөлд хөтлөгдөн, улсын төсвийн бодлогод хүйтэн хөндий, сэтгэлгүй хандсан нь дэндүү хариуцлагагүй үйлдэл мөн гэжээ.

Тиймээс төсвийн нийт зардлыг 20 хувиар хэмнэж, хүндрэл бэрхшээлийг даван туулахад зориулсан эрсдэлийн сан байгуулах, өрх бүрд нэг сая төгрөгийн дэмжлэг үзүүлэх, төсвийн хэмнэлтээр бий болсон хөрөнгийн тодорхой хувийг коронавируст халдварын эсрэг вакцин худалдан авахад зарцуулж, иргэдийнхээ эрүүл мэндийг хамгаалах, үйлдвэр, аж ахуйн нэгж, бизнесийг дэмжсэн мастер төлөвлөгөө гаргахыг даалгажээ.

Энэ нь Ерөнхийлөгч Х.Баттулгын төсөвт тавьж буй дөрөв дэх удааагийн хориг юм. Ерөнхийлөгчийн төсөвт тавьсан хоригийг 14 хоногийн хугацаанд хэлэлцэнэ. Харин олонхийн бүлэг хүлээж авахгүй гэвэл түүний дараагийн нүүдэл юу байх вэ. Энэ талаар мөн тооцсон л байж таарна.

Б.Лхам