ЦЕГ-ын дэд дарга Ж.Амгалан "Цагдаагийн байгууллага халдвар авсан иргэдтэй нэгдүгээр болон дам хавьтал болсон иргэдийг олж илрүүлэх ажлыг тасралтгүй зохион байгуулж байна. Нийт иргэддээ анхааруулж хэлэхэд халдвар авсан иргэдтэй хавьтал болсон хүмүүс онцгойлон дэглэм сахих хэрэгтэй. Хэрэв эрүүл мэндийн байгууллагаас явуулж буй арга хэмжээг бүрэн хэрэгжүүлэхгүй бол энэ өвчин нутагших аюултай.
Нэгдүгээр болон дам хавьталтай хүмүүс дэг барих хамгийн чухал байна. Ойрын болон дам хавьтлыг олж илрүүлнэ гэдэг нь хамгийн их цаг, хүн хүч шаардсан ажил болоод байна. Халдвар авсан иргэд явсан газар орон, уулзсан хүмүүсээ санахгүй байх, дутуу мэдээлэх зэрэг нь маш их эрсдэл үүсгэж байна.
Тиймээс ямар нэгэн байдлаар нэгдүгээр болон дам хавьтлын хүнээ санахгүй байх, худал мэдээлэх, санамсаргүй, хэнэггүй байснаасаа үүдэн халдварыг тархаавал хуультай, ялтай гэдгийг санах хэрэгтэй.
Хуульд зааснаар хорио цээр, хязгаарлалтын дэглэмийн үед халдвараас сэргийлэх арга хэмжээг аваагүй бол торгохоос 3 хүртэл жилээр хорих ялтай. Тиймээс иргэд заавал энэ хуулийн хайчинд орохгүйгээр халдвар хамгааллын дэглэмээ сайтар сахиж, хавьталд орсон иргэд сайн дураараа шинжилгээнд орох шаардлагатай байна.
Мөн цагдаагийн байгууллага халдварт өвчтэй холбоотой 740 гаруй гомдол мэдээллийг шалгаж байна. Үүнээс 39 иргэнийг баривчилж, 590 гаруй хүн, хуулийн этгээдийг 500 гаруй сая төгрөгөөр торгох арга хэмжээ авсан” гэв.
Б.Баатар
