Улсын онцгой комисс яг одоо Төрийн ордонд хуралдаж байна. УОК энэхүү хуралдаанаар ДЭМБ,ЭМЯ болоод Засгийн газрын бүх яам, мэргэжлийн байгууллагуудын ирүүлсэн саналыг хэлэлцэн,нэгдсэн шийдвэр гаргахаар хуралдаж байгаа аж.

Эдгээр саналыг нэгтгэн хөл хорионы хугацааг дахин сунгах эсэхийг шийдэх юм. ЭМЯ дотоодод гарсан халдвар өдрөөс өдөрт нэмэгдэж байгаа тул хатуу хөл хориог долоо хоног сунгах саналыг УОК-т гаргасан гэх мэдээлэл байна.

Харин УОК-ын гишүүд хатуу хөл хорионы зэрэглэлийг нэг шат бууруулж, иргэн бүр амны хаалтаа байнга зүүх,хоорондын зай барих, ариун цэврийг сахих журмыг хатуу мөрдүүлэхийг санал болгож байгаа аж.

Мөн зарим аж ахуйн нэгж, байгууллагыг тусгай горимын дагуу үйл ажиллагааг нь явуулах нөхцөлийг бүрдүүлэх нь зүйтэй гэж үзэж байгаа тухай эх сурвалж хэлж байна. УОК тодорхой нэгдсэн нэг шийдвэрт хүрсний дараа Засгийн газрын хуралдаанаас эцсийн шийдвэрийг гаргах юм.