ХӨСҮТ-ийн захирал Д.Нямхүү коронавирусний эмчилгээний талаар дэлгэрэнгүй мэдээлэл өглөө.

Тэрбээр "Манай улсад коронавирусний халдвар бүртгэгдсэнээс хойш хүнд, хүндэвтэр, хөнгөн гэх мэт бүх л ангиллын хүмүүс эмчлэгдэж байна.

Халдвартай өвчтөний эмчилгээнд барьж байгаа хамгийн гол зарчим бол ДЭМБ-аас гаргаж өгсөн зөвлөмжийг дагаж байна. Мөн манай эмч нарын өөрсдийн чадвар мэдрэмжээр бүгдийг эмчилнэ.

Вирусийн эсрэг гол эм авиган, арбидол, ремдизивир зэрэг эмийг авсан. Сүүлд авсан ремдизивир эм нь маш өндөр өртөгтэй. Дэлхий нийтэд яг одоо хэрэглэж байгаа эмийг Монгол Улс цаг хугацаандаа татаж авсан. Эмчилгээнд бүр нарийн тайлбар өгөх нь зохимжгүй. Учир нь хүн болгоны хувийн онцлогт тохируулж, архаг суурь өвчинтэй хүн байх тул хүн бүрд нь тааруулж эмчилгээ хийж байна. Эмч болгон эмчилж буй хүнийхээ онцлог, нөхцөлд тааруулж байгаа учраас эмчилгээг дэлгэрэнгүй тайлбарлах аргагүй. Мөн эмчилгээг дандаа лабораторийн суурь хяналтад хийдэг. Эмчилгээний үр нөлөөг дандаа хянаж, харьцуулж явдаг.

Эмчилгээ оновчтой явж байна. Одоо бид хүнд хүмүүсээ алдахгүй байх тал дээр онцгой анхаарч байна. Нэг хүний эмчилгээний зардал 6.7-8.9 сая гаруй төгрөг байна гэж гарсан.

 Эм, оношлуур, компьютер томограф зэрэг олон төрлийн шинжилгээ, тухайн хүнд эмчилгээ хийж байгаа 4-5 хүний бүрэлдэхүүнтэй багийн хувийн хамгаалах хэрэгсэл гэх мэт зардлууд орсон байдаг. Мөн маш олон төрлийн шинжилгээг авдаг. Хэрэв өвчтөнүүдийн биеийн байдал хүндэрсэн тохиолдолд амьсгалын аппарат болох ЭКМО бэлэн байдалд байна.

Харин нууц хугацааны хувьд халдвар голомтолж гарч байна. Халдвар маш богино хугацаанд тархаж байгаа. Гэхдээ шинжилгээнд илрэх хугацаа харилцан адилгүй байна. Тухайлбал 18 хүний халдвар 14 хоногийн нууц хугацааг даваад 18-20 хоног дээрээ илэрсэн. Шинэ вирус учир бид судалж байна" гэв.

Б.Батчимэг