Eрөнхий сайд асан С.Баяр, "Пeтровис"-ын Ч.Давааням нар эрүүл мэндийн шалтгаанаар шүүх хуралдааныг цахимаар яаралтай хуралдуулж өгөхийг хүссэн талаар бид өмнө нь мэдээлж байсан билээ.

Тодотговол Анхан шатны шүүхээс Eрөнхий сайд асан С.Баярт тав, "Пeтровис"-ын Ч.Даваанямд хоёр жилийн хорих ял оноосон ба тэд давж заалдах шатны шүүхэд хандаад байсан юм. Гэвч цар тахлын улмаас шүүх хурал хойшилсон тул тэд эрүүл мэндийн шалтгаанаар хуралдааныг цахимаар яаралтай хуралдааныг хүссэн байна. Учир нь, С.Баярын олон жилийн өмнөх тулай өвчин нь хүндэрч, харин Ч.Даваанямын хувьд хорт хавдартай бөгөөд биеийн байдал нь хүнд байгаа гэжээ. 

Тэгвэл энэ долоо хоногт зарлагдсан эрүүгийн хэргийн шүүх хурлын товд С.Баяр нарын шүүх хурал багтсан байна.

Тодруулбал, Чингэлтэй дүүргийн Эрүүгийн хэргийн анхан шатны шүүхийн 2020 оны 07 дугаар сарын 23-ны өдрийн шийтгэл тогтоолтой шүүгдэгч С.Баяр, Ч.Давааням нарт холбогдох эрүүгийн хэргийн давж заалдах шатны шүүх хуралдаан Нийслэлийн Эрүүгийн хэргийн давж заалдах шатны шүүхэд маргааш буюу 2020 оны 12 дугаар сарын 01-ний өдрийн эхний хурлаар товлогдсон байна.

Мөн Чингэлтэй дүүргийн Эрүүгийн хэргийн анхан шатны шүүхийн шийтгэх тогтоолтой шүүгдэгч С.Баярцогт, Б.Ариунсан, Б.Бямбасайхан, Б.Бадрал, Д.Ганболд нарт холбогдох эрүүгийн хэргийн давж заалдах шатны шүүх хуралдаан 2020 оны 12 дугаар 03-ны өдрийн 3 дахь хурлаар товлогджээ. Татварын Ерөнхий газрын дарга асан Б.Ариунсан нь чихрийн шижин өвчин нь хүндэрсэн тул шүүх хуралдааныг цахимаар хуралдуулж өгөхийг мөн хүсч байсан юм. 

Дээрх шүүх хуралдаанууд нь онлайн /цахим/ хэлбэрээр зохион байгуулагдах аж. 

Ташрамд өгүүлэхэд, Шүүхийн eрөнхий зөвлөлөөс цар тахлын нөхцөл байдалтай холбогдуулан анхан болон давж заалдах шатны шүүх хуралдаануудыг хойшлуулж, хэрэг болон нэхэмжлэл, өргөдөл, гомдолыг цахимаар хүлээн авч байсан юм.

Б.Батчимэг