Архангай аймагт коронавирусний хоёр тохиолдол бүртгэгдлээ. Энэ сарын 15-ны өдөр Улаанбаатар хотоос Архангай аймгийн Батцэнгэл суманд хүнс тээвэрлэн очсон иргэн болон хүүгээс нь коронавирусний халдвар илэрсэн байна.
Тодруулбал, халдвар авсан иргэн коронавирусний халдвар Монгол Улсад бүртгэгдэж, хөл хорио тогтоохоос өмнө Улаанбаатар хотод ирээд байсан бөгөөд энэ сарын 15-ны өдөр Улаанбаатараас хувийн автомашиндаа дэлгүүрийн хүнс тээвэрлэн сумандаа очоод байсан аж.
ХӨСҮТ-ийн шуурхай удирдлагын нэгж, Архангай аймгийн тагнуулын хэлтсээс Улаанбаатар хотод илэрсэн ойрын хавьтал Батцэнгэл суманд байгаа тухай мэдээлэл аймгийн онцгой комисст өчигдөр буюу 11 сарын 27-ны 12 цаг 50 минутанд ирсэн байна. Тиймээс аймгийн онцгой комисс түргэвчилсэн оношлуураар хоёр өрхийн 9 иргэнээс шинжилгээ авахад нэг иргэний хариу эерэг гарч, 8 иргэн сөрөг гарсан байна. Улмаар эерэг гарсан шинжилгээний сорьцийг ХӨСҮТ рүү PCR–аар шинжлүүлэхэд тухайн иргэн болон түүний хүүгийн шинжилгээний хариу эерэг гарчээ.
Тиймээс 2020 оны 11 дүгээр сарын 28-наас арванхоёрдугаар сарын 1-ний 18:00 цаг хүртэл Архангай аймгийн Батцэнгэл, Ихтамир суманд хатуу хөл хорио буюу ТЭГ зогсолт хийх шийдвэр гарсан байна.
Ихтамир сумын хувьд батлагдсан тохиолдлын нэгдүгээр хавьтагч болох 3 иргэн байгааг тандалт судалгаагаар тогтоосон аж. Тэдгээр иргэдийн хариу түргэвчилсэн оношлуураар сөрөг гарсан ч PCR шинжилгээний хариу хараахан гараагүй байгаа учир ийнхүү хөл хорио тогтоожээ.
Түүнчлэн хүнс тээврийн жолоочийн нэгдүгээр хавьтал болох 52 иргэнийг тусгаарласан бөгөөд хоёрдугаар хавьталын 102 иргэнийг гэрт нь хатуу хорионд оруулаад байгаа талаар аймгийн онцгой комиссоос мэдээллээ.
Б.Бат
Сэтгэгдэл (3)