Английн Премьер лигийн 13-р тойрогт учраа таарсан Вест Бромвич Альбион болон Манчестер Сити клубуудийнн тоглолт 1-1 ийн харьцаатай эвийн гэрээ байгуулсан. Тус тоглолтын дараа Вест Бромвич Альбион клубийн удирдлагууд ахлах дасгалжуулагч болох Хорват мэргэжилтэн Славен Биличийг үүрэгт ажлаас нь чөлөөлж буйгаа мэдэгдсэн билээ. Тэгвэл түүнийг орлох дасгалжуулагчийг сонгох ажил маш шуурхай явагдаж Англи мэргэжилтэн Сэм Аллардайстай 18 сарын гэрээ байгуулсан гэдгээ зарлалаа.

Сэм Аллардайсийн хувьд  өмнө нь Сандерлэнд, Эвертон, Вест хэм, Ньюкасл тэргүүтэй найман клубийг энэхүү лигт удирдаж байсан ерөнхийдөө бол Премьер лигийг өөрийн арван хуруу шигээ мэдэх туршлагатай дасгалжуулагч юм. 2018 онд Эвертоны ахлах дасгалжуулагчийн албанаасаа чөлөөлөгдсөнөөс хойш анх удаа өөрийн төрөлх лигтээ үзэгчийн хувиар бус ахлах дасгалжуулагчийн хувиар эргэн ирж байна. Мөн тэрээр Английн шигшээ багийн ахлах дасгалжуулагчаар 2016 онд томилогдон ажиллаж байсан ч ердөө нэг тоглолтод багаа удирдан ажилласны дараагаар авилгын хэрэгт нэр холбогдсоноос болж шигшээ багийн албанаас чөлөөлөгдөж байсан билээ.

Ихэнхдээ хүснэгтийн доогуур бичигдэж буй багуудыг удирдаж тэднийг лигтээ үлдэхэд нь тусалдаг Сэм Аллардайсийн шинэ багийн хувьд ч мөн адил байдал сайнгүй байна. Вест Бромвич Альбион клубийн хувьд 13 тойргийн дараагаар 1 хожил, 4 тэнцээ, 8 хожигдсон амжилттай 7 оноотойгоор  хүснэгтийн 19-р байранд бичигдэж байна. Тус клубын спортын албаны захирал “Одоо бидэнд энэ лигт удирдаж байсан бүх багаа сайжруулж дэвшил авч ирж байсан туршлагатай энэ лигийн төлөө зориулагдсан дасгалжуулагч байна. Мөн манай багийнхан, ялангуяа Сэмийн хувьд манай багт Премьер лигт үлдэхэд хангалттай ур чадвартай, бололцоотой тоглогчид байгаа гэдэгт эргэлзэхгүй байгаа” хэмээн хэлжээ. Сэм Аллардайс энэхүү багийг доод лиг рүү унагахгүй гэж харан гэрээ хийсэн тул түүнд ямар нэгэн нөхцөл байдлыг бодитоор харсан төлөвлөгөө байгаа гэдэг нь тодорхой. Тэрээр шинэ  багаа удирдан 12-р сарын 21-нд Астон Вилла клубийг өөрийн талбай дээрээ хүлээн авч тоглоно.

Б.Жаргал