Энэ сарын 12-18-ны өдрүүдэд чөлөөт бөхийн “Хувийн Дэлхийн Цом” Серби улсын нийслэл Белград хотод чөлөөт бөхийн үндсэн гурван төрлөөр амжилттай зохион байгуулагдаж өндөрлөлөө. Тэмцээний салхийг хагалж 12, 13, 14-ий өдрүүдэд сонгомол бөхийн арван жингийн барилдаанууд явагдаж медалийн эздээ тодруулсан билээ. Тэгвэл та бүхэнд сонгомол бөхийн 2020 оны дэлхийн цомын жин тус бүрийн аваргуудыг танилцуулъя.

55кг:

Энэ удаагийн дэлхийн цомын тэмцээн нь ОХУ-ын залуу тамирчин Эмин Сефершаевийн хувьд насанд хүрэгчдийн ангиллын анхны олон улсын хэмжээний том тэмцээн нь байсан бөгөөд нийт тэмцээний туршид зөвхөн нэг оноо өрсөлдөгч бөхчүүддээ алдсан амжилттайгаар итгэл төгс түрүүлсэн. Тэрээр алтан медалийн төлөөх барилдаанд Туркийн бөх Сериф Киличийг (9:0) харьцаагаар ялсан.

60кг:

Энэ жил 21 настай 2018 оны Будапештын дэлхийн аваргын мөнгөн медальтай тэрээр өрсөлдөгчдөө ээлж дараалан ялсаар алтан медалийн төлөөх барилдаанд 63кг-ийн дэлхийн аварга ОХУ-ын тамирчин Степан Марянянтай барилдаж (4:4) харьцаатай сүүлийн онооны дүрмээр ялалт байгуулсан.

63кг:

ОХУ-ын хошой аварга Жамболат Локьяев нь тэмцээний туршид өрсөлдөгч бөхчүүддээ ердөө нэг оноо алдсан гэх үзүүлэлттэйгээр итгэл төгс түрүүллээ. Тэрээр алтан медалийн төлөөх барилдаанд Европын наадмын мөнгөн медальт Унгарын бөх Эрик Торбаг (4:1) харьцаагаар ялж дэлхийн цомын аварга болсон.

67кг:

2020 оны бүх Оросын аварга, Европын аварга шалгаруулах тэмцээний мөнгөн медальт Назир Сабдуллаев нь мэргэжилтнүүдийн таамаг ёсоор Азербайжаны бөх Исламбек Дадовын хамтаар хоёр талаас бүх өрсөлдөгчдөө ялсаар алтан медалийн төлөө хоорондоо барилдахаар болсон. Тэрээр тус барилдааны эцэст (2:1) харьцаагаар хүчтэй өрсөлдөгч Исламбек Дадовыг буулган авсан.

72кг:

2016 онд нутагтаа зохион байгуулагдсан Будапештын дэлхийн аваргад түрүүлж дэлхийн аварга болсон цагаасаа хойш тэрээр 2017 Парис (мөнгө), 2018 Будапешт (мөнгө), 2019 Нур-Султан (хүрэл) гэсэн чамгүй амжилтуудыг гаргасаар байгаа билээ. Дэлхийн цомын төлөө эхний тойргоосоо л Киргизстаны Ази тивийн аварга Руслан Царев, дэлхийн аваргын хошой хүрэл медальт Болгарын Айк Мнацаканян гэх зэрэг хүчтэй өрсөлдөгчидтэй халз тулж ялсаар алтан медалийн төлөө Армений залуу од Малхас Амоянтай барилдаж (1:1) харьцаатай барилдаан өндөрлөж сүүлийн онооны дүрмээр дэлхийн цомын аварга болсон.

77кг:

2012, 2016 онуудын зуны Олимпын хошой аварга, 2011, 2015 онуудын дэлхийн хошой аварга, Европын дөрвөн удаагийн аварга, дэлхийн цомын аварга алдарт Роман Власов зөвхөн хувийн дэлхийн цомд түрүүлэх зорилготой  Белград хотод ирсэн. Учраа таарсан бүх өрсөлдөгчдөө ялсаар алтан медалийн төлөө Европын аваргын мөнгөн медальт Унгарын бөх Золтан Леваигийн эсрэг барилдаж (6:1) харьцаатай ялалт байгуулж дэлхийн цомын аварга болсон. 

82кг:

Оросын залуу од 23 хүртэлх насны Европын аварга Милад Алирзаев нь эхний тойрогтоо Украины бөх Ярослав Фильчаковыг (9:1),  шөвгийн наймд дэлхийн аваргын мөнгөн медальт Орос гаралтай Беларусийн Радик Кулиевыг, хагас шигшээд Молдавын Михаил Брадуг (7:4), алтан медалийн төлөө Туркын Салих Айдиныг (11:0) харьцаагаар тус тус буулган авж түрүүлсэн.

87кг:

22 настай Беларусь залуу Кирилл Маскевич тэмцээний хамгийн том нээлт байсан бөгөөд эхний гурван жинд завсаргүй түрүүлээд байсан ОХУ-ын алтан медалийн цувааг финалын барилдаанд Гүрж гаралтай ОХУ-ын олимпын аварга Давит Чакветадзегийн эсрэг барилдаж (10:0) харьцаатай ялалт байгуулж зогсоосон явдал нь түүнийг дэлхийн сонгомол бөх сонирхогчдын анхаарлын төвд оруулаад байна.

97кг:

Дэлхийн хошой аварга Муса Евлоев анх дэлхийн цомд оролцохоор мэдүүлгээ өгснөөс хойш түүний үзэгчдийн хүлээлтэд зөвхөн алтан медаль байсан билээ. Шөвгийн наймд дэлхийн аваргын мөнгөн медальт Болгарын Кирил Миловын эсрэг (3:0), хагас шигшээд залуучуудын дэлхийн аварга Ираны Абдоллах Саравигийн эсрэг (5:3), финалын барилдаанд Унгарын Алекс Шокегийн эсрэг (3:0) харьцаагаар тус тус ялалт байгуулж шүтэн бишрэгчдийнхээ урмыг хугалалгүй дэлхийн цомын аварга болсон.

130кг:

2018 оны Будапештын дэлхийн аварга, олимпын хүрэл медальт Сергей Семёновын хувьд тус тэмцээнд түүний жингийн гол тамирчид оролцоогүй тул өрсөлдөгч бүрээ (9:0), (8:0), (7:1) гэх зэрэг илт давуу харьцаагаар ялсаар дэлхийн цомын аварга болсон.

Б. Жаргал