Энэ сарын 12-18-ны өдрүүдэд чөлөөт бөхийн “Хувийн Дэлхийн Цом” Серби улсын нийслэл Белград хотод чөлөөт бөхийн үндсэн гурван төрлөөр амжилттай зохион байгуулагдаж өндөрлөлөө. Чөлөөт бөхийн эмэгтэйчүүдийн арван жингийн барилдаанууд 14, 15, 16-ны өдрүүдэд явагдаж медалийн эздээ тодруулсан билээ. Тэгвэл та бүхэнд чөлөөт бөхийн эмэгтэйчүүдийн 2020 оны дэлхийн цомын жин тус бүрийн аваргуудыг танилцуулъя.
50кг: Екатерина Полещук (ОХУ)
2019 оны Нур-Султаны дэлхийн аваргын хүрэл медальт, Иван Ярыгины алтан Гран-пригийн хошой хүрэл медальт Екатерина Полещук нь 2020 оны Европын аварга Болгарын Миглена Селишкатай хагас шигшээ барилдаанд тааран барилдсан нь энэхүү тэмцээний урьдчилсан финал байлаа. Тэрээр тус барилдааны эцэст (2:2) харьцаатай өндөрлөж бүхэл онооны дүрмээр ялалт байгуулж улмаар алтан медалийн төлөө Украины тамирчин Лилия Маланчукыг (10:0) харьцаатай оноогоор цэвэр ялж түрүүлсэн.
53кг: Мария Преволараки (Грек)
Дэлхийн аваргын хошой хүрэл медальт түүний хувьд шөвгийн наймд 23 хүртэлх насны дэлхийн аварга Туркийн Зейнеп Йетгилтэй барилдаж (4:0), хагас шигшээд дэлхийн аваргын хошой мөнгөн медальт Беларусийн Залино Сидаковатай барилдаж (4:0), алтан медалийн төлөө дэлхийн аваргын хүрэл медальт Польшийн Роксана Засинатай барилдаж (5:1) гэсэн харьцаагаар тус тус ялалт байгуулж дэлхийн цомын аварга болсон.
55кг: Ирина Курочкина (Беларусь)
Дэлхийн аваргын хошой хүрэл медальт, Европын аварга, Европын наадмын аварга өөрийн оргил форм дээрээ байгаа Ирина Курочкина нь эхний тойрогтоо дэлхийн аваргын хүрэл медальт, Иван Ярыгины алтан Гран-пригийн хошой аварга ОХУ-ын Ольга Хорошавцеватай оноолт тааран барилдаж (3:3) харьцаатай сүүлчийн онооны дүрмээр буулган авснаар түрүүлэх замаа зассан юм. Тэрээр өрсөлдөгчдөө ялсаар алтан медалийн төлөө Европын аваргын хүрэл медальт Германы Анника Вендлийн эсрэг барилдаж (9:0) харьцаатай илт илүүрхэж түрүүлсэн.
57кг: Анастасия Никита (Молдав)
Энэ жилийн Ромын Европын аваргад дээд жиндээ түрүүлсэн тэрээр жин бууж мөн л алтан медалийн төлөө Сербид ирсэн. Шөвгийн наймд Италийн Арианна Карьеритай барилдаж (10:0), хагас шигшээд Туркийн Мехлика Озтуркын эсрэг барилдаж (15:5) харьцаатай оноогоор цэвэр ялсаар алтан медалийн төлөө Энэтхэгийн залуу од 19 настай Аншу Маликтай барилдаж (5:1) харьцаатай ялялалт байгуулж дэлхийн цомд түрүүлсэн.
59кг: Светлана Липатова (ОХУ)
Юуны өмнө энэхүү жингийн шилдгүүд энэ удаагийн тэмцээнд оролцоогүй тул өрсөлдөөн сул байсан гэдгийг хэлэх нь зүйтэй болов уу.ОХУ-ын хоёр удаагийн аварга, Европын наадмын мөнгөн медаль гэсэн даруухан амжилттай тэрээр Польшийн Магдалена Глодекийг (6:2), Германы Сандра Парушевскиг (2:2) гэх харьцаатай тус бүрийг нь ялснаар алтан медалийн төлөө Молдавын Мариана Чердиварын эсрэг барилдах эрхтэй болсон. Улмаар тус барилдаанд (2:1) гэх харьцаагаар ялалт байгуулан үүргээ биелүүлэн эх орныхоо алтан медалийн тоог нэгээр нэмсэн.
62кг: Айсулуу Тыныбекова (Кыргызстан)
Ази тивийн гурван удаагийн аварга, отгон дэлхийн аварга тэрээр түрүүлэх хамгийн өндөр магадлалтай хэмээгдэж хувийн дэлхийн цомд оролцсон. Таамгийн дагуу гурван өрсөлдөгчдөө оноогоор цэвэр ялж алтан медалийн төлөө дэлхийн аваргын хошой хүрэлтэй Латвийн Анастасия Григорьеватай барилдахаар болсон. Гэвч финалын барилдаанд тэрээр өрсөлдөгчөө (14:0) харьцаагаар илт илүүрхэж мэргэжилтнүүдийн таамаглаж байснаар хувийн дэлхийн цомын аварга болсон. Түүнтэй хамгийн өрсөлдөөнтэй барилдсан тамирчин нь доод жингийнх нь дэлхийн аваргын мөнгөн медальт ОХУ-ын Любовь Овчарова байсан бөгөөд тус барилдаан (13:2) харьцаатай мөн л түүний илт давуу давамгайлал доор өндөрлөсөн.
65кг: Татьяна Рижко (Украин)
Энэхүү жинд оролцсон тамирчид мөн л сул байсан бөгөөд түүний хувьд ОХУ-ын Мария Кузнецоваг (8:4), энэ оны Европын аварга Болгарын Мими Христоваг (13:8) харьцаатай тус тус ялж алтан медалын төлөө Молдавын Ирина Рингачигийн эсрэг барилдаж хоёрдугаар хагаст барилдааныг өөрийн хяналтдаа оруулж (14:4) харьцаатай оноогоор цэвэр хожсоноор Украин улс алтан медальтай орнуудын эгнээнд орж ирсэн.
68кг: Мээрим Жуманазарова (Кыргызстан)
Энэ жил дөнгөж 21 настай Азийн хошой хүрэл медальтай тэрээр гайхалтай барилдааныг үзүүлж хувийн дэлхийн цомын эзэн болсон билээ. Тэрээр хагас шигшээ барилдаанд дэлхийн алт мөнгөн медальт, Европын гурван удаагийн аварга Украины Алина Стадник-Махинятай барилдаж (6:6) харьцаатай бүхэл онооны чанараар ялж улмаар алтан медалийн төлөө Чехийн Адела Ганзличковагийн эсрэг барилдаж (8:2)-р ялснаар дэлхийн чөлөөт бөх сонирхогчдын анхаарлын төвд ороод байна.
72кг: Юлиана Янева (Болгар)
Энэ онд тэмцээн уралдаанд оролцоогүй байсан тэрээр их спортын дэвжээндээ дэлхийн цомын тэмцээн дээр буцан ирж барилдан бүх өрсөлдөгчдөө ялж түрүүлсэн. Түүний эхний учраа нь Аргентины Луз Клара Васкес байсан бөгөөд (9:0) харьцаагаар буулган авч дараагийн тойрогт Словекийн Жужанна Молнарыг (7:2) харьцаагаар буулган авснаар аваргын алтан медалийн төлөө барилдах болсон. Финалд Европын хошой хүрэл медальт Туркийн Бус Тосунтай барилдаж (5:2) харьцаатай ялалт байгуулснаар алтан медальтай улс орнуудын дунд Болгар улс орж ирсэн.
76кг: Алине Фоккен (Герман)
2014 оны Ташкентын дэлхийн аваргын -69кг-ийн ангилалд түрүүлж байсан тэрээр 2019 оноос эхлэн 76кг жинд барилдаж эхлэн Европын болон дэлхийн аваргуудаас хүрэл медаль хүртсэн. Тэгвэл тэрээр эхний тойрогтоо ОХУ-ын энэ оны Европын аварга хашир туршлагатай Букина Екатеринаг (10:0), Кыргызстаны Медет Айпериг (6:4)-р тус тус буулган авж алтан медалийн төлөө 2017 оны дэлхийн аварга, Европын дөрвөн удаагийн аварга Туркийн Адар Ясеминтай барилдаж (3:0) харьцаатай барилдаан өндөрлөсөн.
Б.Жаргал
