Энэ сарын 12-18-ны өдрүүдэд чөлөөт бөхийн “Хувийн Дэлхийн Цом” Серби улсын нийслэл Белград хотод чөлөөт бөхийн үндсэн гурван төрлөөр амжилттай зохион байгуулагдаж өндөрлөлөө. Чөлөөт бөхийн эрэгтэйчүүдийн арван жингийн барилдаанууд 16, 17, 18-ны өдрүүдэд явагдаж медалийн эздээ тодруулсан билээ. Тэгвэл та бүхэнд чөлөөт бөхийн эрэгтэйчүүдийн 2020 оны дэлхийн цомын жин тус бүрийн аваргуудыг танилцуулъя.

57кг: Заур Угуев (ОХУ)

2018, 2019 онуудын дэлхийн хошой аварга, ОХУ-ын хошой аварга Дагестан залуутай өрсөлдөөн үзүүлэх хэмжээний тамирчин байсангүй. Тэрээр Молдавын Анатолий Буруяныг (11:0), Беларусийн нэр дээрээс барилддаг Орос гаралтай Владислав Андреевийг (11:0), Кыргызстаны Бекболат Уулуг (9:0), Ираны Рахман Амузадхалилиг (4:1) харьцаатай тус тус ялж алтан медалийн төлөө Амрений залуу од Арсен Арутюняныг (10:0) буюу оноогоор цэвэр хожсон.

61кг: Абасгаджи Магомедов (ОХУ)

2018 оны дэлхийн залуучуудын аварга, 2020 оны ОХУ-ын аварга болсноор дэлхийн цомд оролцох эрхээ авж шигшээ багийн бүрэлдэхүүндээ багтсан. Дагестан залуу ч үүргээ онц сайн биелүүлж бүх өрсөлдөгчдөө оноогоор цэвэр ялсаар хагас шигшээд шалгаран Пан Америкийн хошой аварга Аргентины Агустин Дестрибаттай барилдаж (7:0) харьцаатай цагаа дуустал барилдаж алтан медалийн төлөө Азербайжаны Ахмеднаби Гварзатиловыг илүүрхэн барилдаж (5:1) харьцаатай ялалт байгуулсан.

65кг: Вазген Теванян (Армени)

21 настай Армений залуу авьяастан тэрээр энэхүү тэмцээний гол нээлтүүдийн нэгээр зүй ёсоор нэрлэгдн. Түүний өрсөлдсөн 65кг жинд дэлхийн гурван удаагийн аварга, Олимпын наадмын хүрэл медальт Азербайжаны Гаджи Алиев, Европын хошой аварга, жингийнхээ отгон дэлхийн аварга ОХУ-ын Гаджимурад Рашидов, дэлхийн аваргын хүрэл медальт Орос гаралтай Унгарын нэрийн өмнөөс барилддаг Исмаил Мусукаев зэргийн бөмбөрцгийн томчууд барилдсан. Харамсалтай нь отгон дэлхийн аварга Гаджимурад Рашидовын хувьд Азербайжаны Гаджи Алиевтай барилдаж байх үедээ гэмтэл авч тэмцээнээ өндөрлүүлсэн бол дэлхийн гурван удаагийн аварга Гаджи Алиев болон Унгарын Исмаил Мусукаев нар хагас шигшээд хоорондоо барилдаж (7:6) харьцаатай Исмаил Мусукаевын ялалтаар өндөрлөж нөгөө талд Вазген Теванян бүх өрсөлдөгчдөө илүүрхсээр алтан медалийн төлөө хоорондоо халз тулахаар болсон. Финалын барилдаан маш тэнцүүхэн үргэлжилсэн ч сүүлийн минутад Армений Вазген Теванян барилдааны санаачлалыг авж барилдаан (9:1) харьцаатай түүний ялалтаар өндөрлөсөн.

70кг: Магомедмурад Гаджиев (Польш)

Оросын Дагестан гаралтай  Европын хошой аварга, дэлхийн аваргын мөнгө, хүрэл медальт, Иван Ярыгины алтан Гран-пригийн аварга тэрээр энэ онд Ромын Европын аваргад түрүүлээд ирсэн бэлтгэл сургуулилт онцгой сайн байгаа билээ. Оноолт таарсан өрсөлдөгчдөө бүгдийн илүүрхэн ялсаар хагас шигшээд ОХУ-ын Чермен Валиевтай хүнд барилдаан хийнэ хэмээн таамаглаж байсан ч өрсөлдөгч бөх нь гарч ирээгүй тул хагас шигшээд барилдалгүйгээр финалд шалгарсан. Алтан медалийн төлөө энэ оны Ромын Европын аваргаас хүрэл медаль хүртээд ирсэн Туркийн Хайдар Явузтай барилдаж (5:0) харьцаатай илүүрхэн түрүүлсэн.

74кг: Разамбек Жамалов (ОХУ)

ОХУ-ын аварга гэх нэрээс өөр дорвитой цол гуншингүй ч гэсэн энэ Дагестан залууг дээгүүр барилдан гэдгийг хүн болгон л таамаглаж байсан. Тэрээр өрсөлдөгч бөхчүүддээ нэг ч оноо алдахгүй нягт барилдаан үзүүлсээр алтан медалийн төлөө барилдахаар гарч ирэв. Түүний нөгөө талд дэлхийн хошой аварга Олимп дэлхийн нийт таван медальтай Италийн Франк Чамизо аварга таамгийн дагуу гарч ирсэн билээ. Тэдний аваргын төлөөх барилдааны эхний хагасыг тэрбээр (1:0) харьцаатайгаар тэргүүлж байсан ч хоёрдугаар хагас эхэлсний дараа Франк Чамизо ард нь гарч 2 оноо аван онооны харьцаа (2:1) болсон билээ. Дэлхийн дээд зэрэглэлийн хоёр тамирчдын тулаан сүүлчийн секундэд шийдвэрлэгдэх хувь заяатай байсан бөгөөд сүүлчийн мөчид Разамбек Жамалов өрсөлдөгчөөсөө хоёр оноо салгаж чадсанаар шигшээ багийнхаа өмнө хүлээсэн үүргээ амжилттай биелүүлсэн юм.

79кг: Ахмед Усманов (ОХУ)

2016 оны залуучуудын дэлхийн аварга 2020 оны ОХУ-ын аварга энэ залуутай өрсөлдөөн үзүүлэх хэмжээний тамирчин бас л байсангүй ээ. Тэрээр Эстоний Эрик Рейнбокыг (10:0), Беларусийн Магомедхабиб Кадзимахамедауг (4:1), Энэтхэгийн Балиян Гоуравыг (10:0), алтан медалийн төлөө Туркийн Мухаммет Котаноглуг (11:0) гэсэн харьцаатай бүх өрсөлдөгчдөө илт давуу илүүрхлээ.

86кг: Даурен Куруглиев (ОХУ)

Европын аварга, Европын наадмын аварга, Иван Ярыгины алтан Гран-пригийн хошой аварга Дагестан залууг түрүүлэх нь гарцаагүй хэмээн ихэнх сонирхогчид таамаглаж байсан билээ. Тэрээр та бүхний итгэлийг хөсөрдүүлэлгүй Францын Ахмед Айбуевыг (8:0), Европын мөнгөн медальт Молдавын Пётр Януловыг (9:2), хагас шигшээд залуучуудын дэлхийн аварга Энэтхэгийн Дипак Пунияг (4:0) харьцаатай ялснаар аваргын алтан медалийн төлөө барилдах эрхтэй болсон. Улмаар финалын барилдаандаа Европын аваргын мөнгөн медальт Польшийн Збигнев Барановскийг (5:1) харьцаатай буулган авсан.

92кг: Алихан Жабраилов

Өмнөх ДАШТ-ээс хүрэл медаль хүртэж байсан Дагестан залуу мөн л бусдын адилаар улсынхаа аварга шалгаруулах тэмцээнд түрүүлээд шигшээ багийнхаа бүрэлдэхүүнд багтан ирсэн билээ. Тэрээр бүх өрсөлдөгчдөө төвөггүй буулган авсаар финалд хүрсэн бөгөөд ингэхдээ Щвейцарийн Сэмюэл Шеррерийг (7:2), Беларусийн Аркадзи Пагасяныг (10:0) гэсэн оноогоор ялсан. Финалын барилдаанд Молдавын Геөргий Рубаевыг бүхий л талаараа илүүрхэн (6:0) харьцаатай өрсөлдөгчөө буулган авч дэлхийн цомын аварга болсон.

97кг: Абдулрашид Садулаев (ОХУ)

Дэлхийн дөрвөн удаагийн аварга, Европын наадмын хошой аварга, Иван Ярыгины алтан гран-пригийн хошой аварга, Европын дөрвөн удаагийн аварга, Олимпын наадмын аварга “Орос Танк” хочит дагестаны алдарт бөх Абдулрашид Садулаевтай энэ зэрэгцэж өрсөлдөөн үзүүлэх бөх уг тэмцээнд байсангүй. Тэрээр Туркийн Сулейман Караденизийг (8:0), Польшийн Радослав Бараныг (12:2), Лондонгийн Олимпын мөнгөн медальт Украины Валерий Андрейцевийг (12:1) харьцаагаар оноогоор цэвэр ялснаар алтан медалийн төлөө Европын гурван удаагийн мөнгөн медальт Беларусийн Александр Гуштынтай барилдах байсан ч түүний өрсөлдөгч нь гэмтлийн улмаас дэвжээн дээр гарж ирээгүй тул алдарт аварга дэлхийн цомын финалд барилдалгүй түрүүллээ.

125кг: Шамиль Шарипов (ОХУ)

Улсынхаа аварга шалгаруулах тэмцээнд түрүүлж чадалгүй мөнгөн медаль аваад ирсэн түүнд заавал түрүүлэх ёстой гэсэн хүлээлт мөн дарамт үлэмж хэмжээгээр байсан нь тодорхой. Гэвч энэ жингийн шилдэг тамирчид уг тэмцээнд ирээгүй тул тэрээр сул өрсөлдөгчдөө ялаар хялбархан түрүүлэв. Тэрээр алтан медалийн төлөө Европын хошой мөнгөн медальтай Польшийн Роберт Барантай барилдаж (4:1) харьцаатай ялж дэлхийн цомын хамгийн хүнд жингийн аварга болсон.

Б.Жаргал