Аргентины хөлбөмбөгч зургаан удаагийн “Ballon d’Or” шагналын эзэн, зургаан удаагийн Европын лигүүдийн мэргэн бууч тэрээр хөлбөмбөгийн түүхэн дэх хамгийн шилдэг тамирчдын тоонд зүй ёсоор багтдаг билээ.

Тэрээр анх 2000 онд Испанийн Барселона клубд ирснээсээ хойш хорин жилийн туршид тасралтгүй хүчин зүтгэсээр ирсэн. 2004 оны улирлаас эхлэн багийн үндсэн бүрэлдэхүүнд багтаж тэр цагаас хойш клубийн хүрээнд одоогийн байдлаар 17 улирлын турш нийт 749 албан ёсны тоглолтод оролцоод байна. Тэгвэл энэ мягмар гарагт Реал Валладолид клубийн эсрэг 65 дахь минутад хаалганы доод буланд 644 дахь гоалаа шигтгэснээр Бразилын домог Пелегийн 1956 оноос 1974 оны хооронд нутгийнхаа Сантос клубын төлөө 643 гоал оруулсан амжилтыг эвдлээ. Тэрээр тус тоглолтын дараа өөрийн инстаграм хаяг дээрээ “Анх хөлбөмбөг тоглож эхэлж байхдаа би энэ рекордыг эвдэж чадна гэж хэзээ ч бодож байсангүй” гэж нийтэлж үнэнч хөгжөөн дэмжигчиддээ талархал илэрхийлсэн.

Түүний энэхүү түүхэн амжилтад зориулан Испанийн Ла-Лигийн ивээн тэтгэгч шар айраг үйлдвэрлэдэг Будвайзер компаниас дээрээ 1-644 хүртэлх өөр өөр тоотой “Месси” хэмээн нэрлэсэн дахин давтагдахгүй шинэ төрлийн 644 ширхэг шар айраг үйлдвэрлэн түүний хохирогчид болох 160 хаалгачид руу дурсгалын бэлэг болгон илгээсэн юм. Тэдний ихэнх нь нэгээс олон шар айраг бэлгэнд авснаас хамгийн олныг Испанийн Ла-Лигийн Алмериа болон Валенсия клубуудийн төлөө арван жил хүчин зүтгэсэн Бразил хаалгач Диего Алвес 21 ширхгийг хүлээн авсан бол түүний дараа Испани хаалгач Горка Ираисос болон Испанийн домогт хаалгач Икер Касильяс нар тус тус 17 ширхэг шар айргийг Будвайзер компаниас бэлгэнд авсан.

Мөн 1 дугаартай шар айраг Лионель Мессигийн анхны хохирогч болох 2005-2008 оны хооронд  Альбасете клубийн хаалгач байсан Рауль Вальбуэнагийн эзэмшил болсон бол 644 дугаартай шар айраг нь Реал Валладолид клубийн хаалгач Хорди Масипт очжээ. Нэмэлтээр хүргэхэд одоо цагийн шилдэг хаалгач Атлетико Мадрид клубийн хаалгач Ян Облак 10 шар айраг хүлээж авсан нь дээгүүр орох үзүүлэлт ба Лионель Мессигийн сүүлчийн хохирогчдын нэг болох Италийн домогт хаалгач Джанлуиджи Буффон дурсгалын шар айргуудыг хүлээн авч өөрийн сошиал хаягаараа дамжуулан түүнд баяр хүргэжээ.

Б.Жаргал