2021 онд IJF буюу олон улсын жүдо бөхийн холбооноос зохион байгуулж буй эхний тэмцээн болох “Доха Мастерс 2021” тэмцээний аваргын төлөө 5 тивийн 70 орноос хүрэлцэн ирэх 401 тамирчид /эрэгтэй-215, эмэгтэй-186/ эрэгтэй 7, эмэгтэй 7 жинд 1-р сарын 11-13-ны хооронд өрсөлднө.

Манай улсын шигшээ баг энэхүү тэмцээнд өргөн бие бүрэлдэхүүнтэй оролцох бөгөөд үндэсний шигшээ багийн ахлах дасгалжуулагч МУГТ, МУГД Х.Болдбаатар, ОУХМ П.Нямлхагва, ОУХМ Ч.Болдбаатар нараас бүрдсэн дасгалжуулагчдын баг үндэсний шигшээ багийн тамирчдыг ахлан Доха хотыг зорихоор болсон.

Тэгвэл тус тэмцээнд манай улсаас нийт 16 тамирчин оролцох бөгөөд ХӨСҮТ-өөс өгсөн зааварчилгааны дагуу коронавирусийн хоёр дахь /PCR/ шинжилгээгээ өгснөөр өнөөдөр буюу 2021 оны 1-р сарын 8-ны өдөр “Хүннү Эйр” компанийн нислэгээр Доха хотыг зорьж байна. Шигшээ багийн бие бүрэлдэхүүн 14-ний өдөр эх орондоо буцан ирэх юм.

Шигшээ багийн бүрэлдэхүүн:

Эрэгтэй:

• -60кг: МУГТ Д.Амартүвшин, ОУХМ Л.Өнөбөлд
• -66кг: ОУХМ Г.Хэрлэн, ОУХМ Ё.Басхүү
• -73кг: ОУХМ Ц.Цэнд-Очир, МУГТ Г.Одбаяр
• -81кг: С.Моллай, ОУХМ О.Ууганбаатар
• -90кг: ОУХМ Г.Алтанбагана
• +100кг: ОУХМ Ө.Дүүрэнбаяр

Эмэгтэй:

• -48кг: МУГТ М.Уранцэцэг, ОУХМ Г.Наранцэцэг
• -52кг: ОУХМ Л.Сосорбарам, ОУХМ Б.Хорлоодой
• -57кг: МУХБ, МУГТ Д.Сумъяа
• -63кг: ОУХМ Б.Ганхайч

Уг тэмцээн нь Олимпийн оноо олгохоос гадна оролцож буй тамирчид өндөр зэрэглэлийнх буюу жин тус бүрийн чансааны шилдэг 32 тамирчид оролцдог тул Олимп дөхсөн энэ үед оролцож буй тамирчдын хувьд маш их үр өгөөжтэй тэмцээн болж зохиогдох болно хэмээн мэргэжилтнүүд таамаглаж байна.

Б.Жаргал