Дэлхийн чансааны эхний 32 тамирчдыг нэг дор цуглуулж чаддаг Мастерс тэмцээн энэ жилийн IJF-ийн цуврал тэмцээнүүдийн салхийг хагалж Катар улсын нийслэл Доха хотод зохиогдох гэж байгаа билээ. Мөн өчигдөр буюу 1-р сарын 8-ны өдөр манай улсын шигшээ баг 16 тамирчдын бүрэлдэхүүнтэйгээр Доха хотод газардсан. Тэгвэл уг тэмцээний эхний өдөр буюу 1-р сарын 11-нд зохиогдох эрэгтэйчүүдийн -60кг жинд манай улсаас МУГТ Д.Амартүвшин болон ОУХМ Л.Өнөболд нар барилдах тул тус тамирчдыг болон тэдэнтэй нэг жинд өрсөлдөх дэлхийн шилдгүүдийг, тэдний хоорондын ялалт ялагдлын харьцаа зэрэг мэдээллүүдийг хүргэе.
Дашдаваагийн Амартүвшин
ДАШТ-ий мөнгөн медальт, IJF-ийн цуврал Гранд Слам, Гран При тэмцээнүүдийн 7 алт, 7 мөнгө, 9 хүрэл медальт мөн өмнөх жилүүдийн Мастерс тэмцээнүүдийн 3 удаагийн хүрэл медальт тэрээр жиндээ 13-р байранд жагссан тул аль нэг хэсэг рүү санаандгүй байдлаар шидэгдэж орох юм.
Лхагважамцын Өнөболд
Өнгөрсөн оны Монгол улсын улсын аварга, 2019 оны Екатеринбургийн Гранд Сламын аварга гэх даруухан амжилттай түүний хувьд уг тэмцээнд жингийнхээ 23-р байранд бичигдэж байгаа юм. 2019 оны Мастерсд шагналт 7-р байранд шалгарсан тул энэ жил амжилтаа ахиулах бүрэн боломжтой.
Роберт Мшвидобадзе (ОХУ)
ДАШТ-ий мөнгөн медальт, Европын хошой аварга Гүрж гаралтай ОХУ-ын нэрийн өмнөөс барилддаг тэрээр энэ жингийн хамгийн хүчтэй тамирчдын нэг юм. Доха Мастерсд -60кг жинд оролцож буй 33 жүдочдыг чансаагаараа тэргүүлсэн тул А хэсгийг тэргүүлж барилдана.
Л.Өнөболд 0:3 Роберт Мшвидобадзе (өнгөрсөн оны Мастерсд таарч барилдсан)
Д.Амартүвшин 4:2 Роберт Мшвидобадзе
Шарафуддин Лутфиллаев (Узбекистан)
Узбекистаны нэгдүгээр сонголтоор энэхүү тэмцээнд ирж байгаа 2019 оны ДАШТ-ий мөнгөн медальт түүний хувьд үргэлж хүчтэй өрсөлдөгчдийн жагсаалтад багтсаар ирсэн. Жиндээ нийт оноогоороо 2-т жагссан тул B хэсгийг толгойлон барилдах юм.
Л.Өнөболд 0:0 Шарафуддин Лутфиллаев
Д.Амартүвшин 2:1 Шарафуддин Лутфиллаев
Тэрээр анх 2014 оны Инчоны Азийн наадамд түрүүлж гарч ирж байсан бөгөөд түүнээс хойш ДАШТ-ээс алт хүрэл медаль, Олимпын наадмаас мөнгөн медаль хүртсэн залуу аварга билээ. Нэг ёсондоо манай улсын бөхчүүдтэй барилдаан таардаг гэж хэлж болохоор хамгийн хүчтэй өрсөлдөгч юм. Жингийнхээ 3-р байранд жагссан тул C хэсгийг толгойлон барилдана.
Л.Өнөболд 0:0 Елдос Сметов
Д.Амартүвшин 1:3 Елдос Сметов
Уг тэмцээний хошой мөнгөн медальт тэрээр энэхүү амжилтаа ахиулан зөвхөн алтан медаль хүртэхийн төлөө Дохаг зорьсон нь тодорхой. Түүний хувьд -60кг жиндээ D хэсгийг тэргүүлэн барилдана. Манай улсын тамирчид чансааны эхний 8-т багтаагүй тул эхний тойрогтоо ч түүнтэй нүүр тулах боломжтой юм.
Л.Өнөболд 0:0 Франсиско Гарригос
Д.Амартүвшин 4:0 Франсиско Гарригос
ОХУ-ын 60кг-н ирээдүй гэгдэж байгаа залуу мөн л Мастерсын аваргын төлөө D хэсгийн хоёрдугаар хагасыг тэргүүлэн барилдана. Түүний хувьд өнгөрөгч 2020 оны Европын аварга шалгаруулах тэмцээний финалд нутгийн ах Роберт Мшвидобадзегийн эсрэг барилдаж мөнгөн медаль хүртсэн билээ. Түүнээс гадна Будапештын Гранд Сламаас алтан медаль, Парисын Гранд Сламаас мөнгөн медаль хүртсэн байна. Өмнө нь манай улсын тамирчдаас зөвхөн ОУХМ Э.Ариунболдын эсрэг барилдаж ялалт байгуулж байжээ.
Лукум Чхвимиани (Гүрж)
Тус жингийн отгон дэлхийн аварга түүний медалийн цуглуулгад Мастерсын медаль хараахан байхгүй. 2019 оны Токиогийн ДАШТ үеэр өөрийгөө дэлхий нийтэд батлан харуулсан догшин барилдаант Гүрж залуу яах аргагүй шилдэг өрсөлдөгчдийн нэг билээ. Түүний хувьд B хэсгийн хоёрдугаар хагасыг тэргүүлэн барилдах бөгөөд хэсгийн аваргын төлөө Токиогийн ДАШТ-ий финалын барилдаан давтагдах магадлалтай байна.
Л.Өнөболд 0:0 Лукум Чхвимиани
Д.Амартүвшин 2:2 Лукум Чхвимиани
Ян Юн Вэй (Тайвань)
Бидний онцолж буй сүүлийн тамирчин бол Тайванийн залуу авьяастан Ян Юн Вэй юм. Хэдийгээр Гранд Сламын мөнгө хүрэл медалиас өөр том шагналгүй ч аль хэдийнээ дэлхийн жүдо бөх сонирхогчдын барилдааныг нь үзэх дуртай хурдан шаламгай, уран гоё техниктэй тамирчдын нэг болоод амжсан нэгэн. 2019 оны Токиогийн ДАШТ-д шилдгүүдийг ялсаар үдээс хойш шигшээ шувтаргын барилдаанд барилдаж байсан нь түүнийг хүчтэй өрсөлдөгч гэдгийг нь харуулна. Мөн энэхүү жинд хэдийгээр Япон бөх ирээгүй ч Ян Юн Вэйгийн хувьд Япон улсад бэлтгэлээ хийж тэндээ амьдардаг бараг л Япон тамирчин юм. Жингийнхээ 9-р байранд эрэмбэлэгдсэн тул одоогоор аль хэсэгт хуваарилагдах тухай таамаг байхгүй байна.
Л.Өнөболд 1:0 Ян Юн Вэй
Д.Амартүвшин 2:2 Ян Юн Вэй
Б.Жаргал
