Дэлхийн чансааны эхний 32 тамирчдыг нэг дор цуглуулж чаддаг Мастерс тэмцээн энэ жилийн IJF-ийн цуврал тэмцээнүүдийн салхийг хагалж Катар улсын нийслэл Доха хотод зохиогдох гэж байгаа билээ. Мөн өчигдөр буюу 1-р сарын 8-ны өдөр манай улсын шигшээ баг 16 тамирчдын бүрэлдэхүүнтэйгээр Доха хотод газардсан. Тэгвэл уг тэмцээний эхний өдөр буюу 1-р сарын 11-нд зохиогдох эмэгтэйчүүдийн -48кг жинд манай улсаас МУГТ М.Уранцэцэг болон ОУХМ Г.Наранцэцэг нар барилдах тул тус тамирчид болон тэдэнтэй нэг жинд өрсөлдөх дэлхийн шилдгүүдийг, тэдний хоорондын ялалт ялагдлын харьцаа зэрэг мэдээллүүдийг хүргэе.

Мөнхбатын Уранцэцэг

ДАШТ-ий иж бүрэн медальт, Мастерсын алт хүрэл медальт МУГТ М.Уранцэцэг нь шигшээ багийнхаа хамтаар Олимпын оноогоо ахиулах зорилготой Катар улсыг зорьсон. Олимпоос бусад бүх тэмцээний медалиуд тэр тусмаа бүгд алтан медалиуд түүний цуглуулгад байдаг билээ. Мэдээж тэрээр өөрийн жингийнхээ хамгийн хүчтэй жүдочдын нэг бөгөөд тэмцээний эхний өдөр Мастерсаас ээлжит нэгэн медалиа авахын төлөө B хэсгийн хоёрдугаар хагасыг тэргүүлэн барилдана.

Ганбаатарын Наранцэцэг

2019, 2020 онуудын Монгол улсын хошой аварга, өнгөрсөн жилийн “Чиндао Мастерс”-ын мөнгөн медальт тэрээр шигшээ багийн эгчийн хамт -48кг жинд өрсөлдөнө. Жилийн өмнөх Мастерсаас хойш дэлхийн жүдо бөх сонирхогчдын анхаарлын төвд орсон ч цар тахлын улмаас ихэнх тэмцээн уралдаанууд цуцлагдсан тул өөрийгөө дахин харуулах  боломж хомс олдсон. Тэгвэл ирэх өдрүүдэд үзэгчдэд дахин нэг удаа өөрийнхөө барилдааныг Мастерсын дэвжээн дээрээс харуулах боломж түүнд ирээд байна.

Дистрия Красники (Косово)

Дэлхийн чансааг тэргүүлж буй ДАШТ-ий хүрэл медальт, Мастерсын хошой аварга Дистрия Красники мөн л бусад шилдгүүдийн адилаар Катарыг зорьсон. Жингийнхээ чансааг тэргүүлсэн тул А хэсгийг толгойлон барилдах бөгөөд МУГТ Уранцэцэг В хэсэгт орох тул зөвхөн финалд хоорондоо нүүр тулах боломжтой гэсэн үг. Харин ОУХМ Г.Наранцэцэг аль нэг хэсэг рүү санаандгүй байдлаар орох тул түүний хэсэгт орж дахин учраа таарах боломжтой.

Г.Наранцэцэг 0:2 Дистрия Красники

М.Уранцэцэг 1:2 Дистрия Красники

Дарья Билодид (Украин)

Дэлхийн жүдогийн залуу од, дэлхийн хошой аварга, IJF-ийн цуврал Гранд Слам, Гранд При тэмцээнүүдийн 7 удаагийн аварга түүний хувьд оны өмнөхөн жин өгсөн Будапештын Гранд Сламд оролцож хүрэл медаль хүртсэн. Энэ нь түүний 2018 оноос хойш олон улсын тавцанд хүртсэн 2 дахь ялагдал нь байв. Тэрээр ойрхон хоёр ялагдахыг хүсэхгүй бөгөөд зөвхөн Мастерсын алтан медалийн төлөө л В хэсгийг толгойлон барилдах нь тодорхой. Түүний толгойлж буй В хэсгийн доод хэсгийг МУГТ М.Уранцэцэг ахалж буй бөгөөд шөвгийн 4-ийн төлөөх барилдаанд хоорондоо дахин нэг удаа нүүр тулах өндөр магадлалтай байна.

Г.Наранцэцэг 0:0 Дарья Билодид

М.Уранцэцэг 0:1 Дарья Билодид

Фуна Тонаки (Япон)

Жүдо бөхийн анх үүссэн нуаг болох арлын Япон улсыг төлөөлөн ирж буй цөөн хэдэн жүдочдын нэг болох дэлхийн аварга, Мастерсын аварга Фуна Тонаки чансааны дагуу С хэсгийг ахлан барилдана. Хэдий Олимпын наадамд эх орноо төлөөлөн оролцох эрхээ авсан хэдий ч Японы жүдо бөхийн холбооноос түүнийг энэхүү тэмцээнд явуулж буй нь тодорхой нэг шалтгаантай мэт байв. Нутагтаа зохиогдох Олимпод аварга болохын тулд тэрээр өмнө  нь 4 таарч барилдаад 4 ялагдаад байгаа Дарья Билодидыг ялах хэрэгтэй. Олимпоос өмнө нь Дарья Билодидыг буулган авах аргыг хайж олох, бэлдсэн хувилбарудаа түүн дээр туршин үзэх, Украины шигшээ багаас барих хариу цохилт  гэх мэт дэвжээн дээрх тулаанаас гадна хоёр улсын судалгааны багуудын хооронд тактик, судалгаан дээр суурилсан тулаан хагас шигшээ шатанд  дэвжээнээс гадуур болох магадлалтай байна.

Г.Наранцэцэг 0:1 Фуна Тонаки

М.Уранцэцэг 3:4 Фуна Тонаки

Мелани Клеман (Франц)

Хэдийгээр ДАШТ болон Олимпын медальгүй ч дэлхийн жүдо бөх сонирхогчдын сайн танил болсон тэрээр D хэсгийн доод хэсгийг толгойлон барилдана. Өмнөх жилийн Чиндаогийн Мастерсын хүрэл медальт тэрээр энэ жил дахин шагналт байранд орох магадлал өндөр байна. Түүний хувьд 2019 онд онцгой сайн байсан бөгөөд Д.Билодидыг тус оныхоо Тбилисийн Гранд Пригийн алтан медалийн төлөө буулган авч удаан хугацаанд амсаагүй байсан ялагдлыг түүнд мэдрүүлсэн билээ. Мөн тус оныхоо ДАШТ-ий хүрэл медалийн төлөөх барилдаанд МУГТ М.Уранцэцэгт ялагдаж шагналт 5-р байранд орж байсан.

Г.Наранцэцэг 1:0 Мелани Клеман (Өнгөрсөн оны Мастерсын хагас шигшээд таарч барилдсан)

М.Уранцэцэг 2:2 Мелани Клеман

Паула Парето (Аргентин)

Хэдий энэ жил 34 настай ч С хэсгийг Фуна Тонакигийн хамтаар тэргүүлж буй Паула Парето аваргын  алдар гавьяаг дурдвал Олимпын наадмын аварга, хүрэл медальт, дэлхийн аваргын иж бүрэн медальт, Пан Америкийн 6 удаагийн аварга гэх мэт бүх тэмцээнүүдийн алтан медаль байдаг бол зөвхөн Мастерсын алтан медаль байдаггүй байна. Өмнө нь 4 удаа тус тэмцээнд оролцож байсан ч зөвхөн мөнгөн медаль хүртэж байсан тэрээр энэ удаад сүүлчийн дайралтаа хийхээр Дохаг зорьсон болох нь тодорхой.

Г.Наранцэцэг 0:0 Паула Парето

М.Уранцэцэг 4:1 Паула Парето

Б.Жаргал