Дэлхийн чансааны эхний 32 тамирчдыг нэг дор цуглуулж чаддаг Мастерс тэмцээн энэ жилийн IJF-ийн цуврал тэмцээнүүдийн салхийг хагалж Катар улсын нийслэл Доха хотод зохиогдох гэж байгаа билээ. 1-р сарын 8-ны өдөр манай улсын шигшээ баг 16 тамирчдын бүрэлдэхүүнтэйгээр Доха хотод газардсан. Тэгвэл уг тэмцээний эхний өдөр буюу 1-р сарын 11-нд зохиогдох эрэгтэйчүүдийн -66кг жинд манай улсаас ОУХМ Ё.Басхүү болон ОУХМ Г.Хэрлэн нар барилдах бөгөөд 2021 оны Олимпын наадмыг Монгол улсаа төлөөлөн энэ жинд хэн зорих нь тодорхой биш байгаа тул манай улсын хоёр тамирчдын хувьд маш чухал тэмцээн юм. Тэгвэл тус тамирчид болон тэдэнтэй нэг жинд өрсөлдөх дэлхийн шилдгүүдийг, тэдний хоорондын ялалт ялагдлын харьцаа зэрэг мэдээллүүдийг хүргэе.

Ганболдын Хэрлэн

Дэлхийн чансааны 4-т эрэмбэлэгдэж буй түүний хувьд энэхүү тэмцээнд -66кг жинд оролцохоор нэрээ өгөөд буй нийт тамирчдаас чансаагаараа 2-т жагссан тул В хэсгийг тэргүүлэн барилдана. 2017 оны Санкт Петербургийн Мастерсын аварга, 2019 оны Чиндаогийн Мастерсын мөнгөн медальт тэрээр уг тэмцээнд одтой барилддаг нэгэн.

Ёндонпэрэнлэйн Басхүү

Дэлхийд нэрээ албан ёсоор дансалж амжаагүй яваа ч өөрийн жиндээ бүх томчуудыг айлгахаар хэмжээнд хүрээд удаж байгаа түүний хувьд D хэсгийн доод хэсгийг толгойлон барилдахаар болсон. 2019 онд Чиндаогийн Мастерсын хүрэл медальт түүнийг Токиогийн ДАШТ-д шагналт 5-р байранд шалгарснаар нь үзэгч та бүхэн сайн таних билээ.

Мануэль Ломбардо (Итали)

Залуучуудын дэлхийн аварга, 2019 оны Чиндаогийн Мастерсын аварга, ДАШТ-ий 5-р байрын шагналт дэлхийн чансааг тэргүүлэгч тэрээр А хэсгийг толгойлон барилдана. Түүний уран гоё барилдааныг хэдийнээ дэлхий даяар шимтэн үздэг болоод байгаа билээ. Тэрээр Олимпоос өмнө жингийнхээ хүчтэй өрсөлдөгчидтэйгөө дахин нэг удаа нүүр тулахаар Дохад ирээд байна.

Г.Хэрлэн 0:2 Мануэль Ломбардо

Ё.Басхүү 0:1 Мануэль Ломбардо

Важа Маргвелашвили (Гүрж)

Маш хүчирхэг эрэгтэй шигшээ багтай Гүрж улсын -66кг-ийн төлөөлөл болох ДАШТ-ий хүрэл медальт Важа Маргвелашвили Мастерсын гурван хүрэл медалийнхаа өнгийг алтан шаргалаар солих зорилготой Дохаг зорьсон нь тодорхой. Түүний хувьд С хэсгийг тэргүүлэн барилдах юм.

Г.Хэрлэн 2:2 Важа Маргвелашвили

Ё.Басхүү 0:0 Важа Маргвелашвили

Ан Баул болон Ким Лим Хван (БНСУ)

Олимпын наадмын мөнгөн медальт, дэлхийн аварга, Мастерсын аварга тэрээр Олимпын наадмаас бусад бүх тэмцээнүүдэд түрүүлээд үзчихсэн нэгэн. Тэгвэл сүүлийн жилүүдэд БНСУ-ын цэргийн албанаас зайлсхийсэн гэх шалтгаанаар тэмцээн уралдаанд бага оролцож улсынхаа нэгдүгээр сонголт байж энэ оны Токиогийн Олимпод оролцох үгүй нь эргэлзээтэй нөхцөл байдалд ороод байсан билээ. Харин оны өмнө оролцсон хоёр тэмцээндээ түрүүлээд байгаа бөгөөд энэ нь түүний хувьд бэлтгэл сургуулилт буцаад хэвийн байдалдаа орсон гэдгийг нь харуулж байгаагаас гадна Олимпын дэвжээн дээр дахин нэг удаа барилдаж дутуугаа гүйцээх боломжийг нь өөрт нь хадгалж үлдээгээд байна. Жиндээ 11-т эрэмбэлэгдсэн тул аль нэг хэсэг рүү шидэгдэж орох юм.

2019 оны Токиогийн ДАШТ-д БНСУ-ын шигшээ баг -66кг жинд Ким Лим Хваныг Ан Баул аваргатай хамт давхарлаж хамтад нь оролцуулсан. Тус тэмцээнд түүний нутгийн өрсөлдөгч Ан Баул эхний тойрогтоо ОУХМ Ё.Басхүүд ялагдал хүлээсэн бол түүний хувьд итгэл алдалгүй амжилттай барилдсаар финалд шалгаран мөнгөн медаль хүртсэн. Тэрээр энэхүү амжилтыг гаргаснаар өөрийгөө Токиогийн Олимпод эх орноо төлөөлөн оролцох бүрэн боломжтой тамирчин гэдгээ харуулж чадсан. Харин оны өмнө зохиогдсон Парисын Гранд Сламд оролцож финалд шалгаран Ан Баулд ялагдсанаар түүний Олимпод оролцох магадлал нь бага зэрэг буурсан. Тэгвэл энэхүү тэмцээнд БНСУ-ын шигшээ баг мөн л тэднийг хамтад нь оролцуулж байгаа бөгөөд ирэх 7-р сард эх орноо төлөөлөн Олимпод оролцохын тул Дохагийн дэвжээн дээр хэн хэн нь амжилттай барилдах шаардлагатай болоод байна. Ташрамд дурдахад тэрээр В хэсгийг ОУХМ Г.Хэрлэнгийн хамтаар толгойлж байгаа тул хэсгийн аваргын төлөө хоорондоо нүүр тулах магадлалтай.

Г.Хэрлэн 0:1 Ан Баул        Г.Хэрлэн 0:1 Ким Лим Хван 

Ё.Басхүү 1:2 Ан Баул         Ё.Басхүү 0:0 Ким Лим Хван

Баруч Шмайлов болон Таль Фликер (Израиль)

Баруч Шмайловын хувьд Мастерсын мөнгө хүрэл медалиас өөр том гавьяа шагналгүй ч дэлхийн чансаанд үргэлж дээгүүр бичигддэг уран гоё барилдаантай нэгэн. Мэдээж Мастерсын иж бүрэн медальтай болох зорилгоос гадна Токиогийн дэвжээн дээр эх орноо төлөөлөн барилдахын төлөөх маш том тулаанд ялах зорилгодоо нэг алхам ойртохын төлөө Катар улсыг зорьсон. Жиндээ 6-т жагсаж байгаа тул С хэсгийн хоёрдугаар хагасыг толгойлон барилдах нь тодорхой болсон.

Таль Фликер нь ДАШТ-ий хүрэл медальтай ч Мастерс тэмцээнээс хараахан медаль хүртэж амжаагүй яваа нэгэн. Дэлхийд өөрийн нэрээ аль хэдийнээ таниулсан түүнийг хэн ч сул өрсөлдөгч хэмээн харахгүй. Олимпод нэг улсаас нэг жинд зөвхөн нэг бөх оролцох боломжтой байдаг тул Баруч Шмайловтой тус эрхийн төлөө 2017 оноос эхлэн өрсөлдсөөр байна. Гэвч одоо хүртэл хэн хэнд нь адил хэмжээний боломж байгаа тул түүний хувьд Олимп хүртэл үлдсэн тэмцээнүүдэд амжилт гаргаж эх орныхоо итгэлийг олж авах зайлшгүй шаардлагатай байна. Чансааны эхний 8-т багтаж чадаагүй тул аль хэсэгт хуваарилагдан орох нь тодорхойгүй байна.

Г.Хэрлэн 2:0 Таль Фликер   Г.Хэрлэн 2:0 Баруч Шмайлов  

Ё.Басхүү 2:0 Таль Фликер   Ё. Басхүү 2:0 Баруч Шмайлов

Георгий Зантарая (Украин)

Энэ жил хэдийнээ 33 настай ч гэсэн дэлхийн аварга, ДАШТ-ий нийт 6 медальт, Мастерсын аварга түүнийг дутуу үнэлж болохгүй. Оролцож болох бүхий л тэмцээнүүдээс медаль хүртээд үзчихсэн хашир туршлагатай түүний хувьд зөвхөн Олимпын наадмын шагналын тавцан дээр зогсож үзээгүй билээ. Тэгвэл энэ жил Токиогийн дэвжээн дээр сүүлийнхээ Олимпын дайралтыг хийхээр бэлтгэж байгаа түүний хувьд Олимпын өмнөх бүхий л тэмцээнүүдэд амжилттай оролцож хүчтэй өрсөлдөгчидтэй нүүр тулж, дэлхийн чансаанд дээгүүр байр эзлэх нь нэн тэргүүний зорилго болоод байна.

Г.Хэрлэн 0:0 Георгий Зантарая

Ё.Басхүү 2:0 Георгий Зантарая

Даниэль Каргнин (Бразил)

Залуучуудын дэлхийн аварга, Пан Америкийн хошой аварга түүний хувьд Олимпын наадамд эх орноо төлөөлөн оролцох нь бараг л тодорхой болоод байгаа билээ. Тэрээр өмнө нь Мастерс тэмцээнд 4 удаа оролцож байсан ч хараахан медаль хүртэж амжаагүй байдаг байна. Энэ удаад тэрээр D хэсгийг толгойлон барилдаж байгаа бөгөөд хэсгийн аваргын төлөө ОУХМ Ё.Басхүүгийн эсрэг барилдах боломжтой байна.

Г.Хэрлэн 0:1 Даниэль Каргнин

Ё.Басхүү 1:0 Даниэль Каргнин

Ниджат Шихализадзе болон Орхан Сафаров (Азербайжан)

Азербайжаны залуусын хувьд дэлхийн чансааны дундуур бичигдэж байгаа ч хоорондоо Олимпын наадамд эх орноо төлөөлөн оролцохын төлөө хүчтэй өрсөлдөж байна. Ниджат Шихализадзегийн хувьд тэртээх 2005 оны ДАШТ-д 17 настай байхдаа хүрэл медаль хүртэж байсан төрмөл бөх бөгөөд Олимпын наадмаас хараахан медаль хүртэж амжаагүй явна. Хэдийгээр сүүлийн үед өндөр амжилт гаргахгүй байгаа ч сүүлчийн удаа Олимпын дэвжээн дээр гарахын тулд энэхүү тэмцээнд өрт байгаа бүхнээ дайчлан барилдана. ДАШТ-ий мөнгө хүрэл медалиудыг -60кг жинд барилддаг байхдаа хүртэж байсан Орхан Сафаровын хувьд 2019 оноос эхлэн -66кг руу жин өгсөж барилдах болсон. Эхэн үедээ жиндээ дасаж өгөхгүй амжилт муу үзүүлж байсан ч 2020 оноос эхлэн хуучных шигээ барилдаж эхлэх болсон. Тэрээр мөн өнгөрсөн оны сүүлчээр зохиогдсон Европын аварга шалгаруулах тэмцээнд түрүүлсэн билээ.

Г.Хэрлэн 1:0 Ниджат Шихализадзе   Г.Хэрлэн 0:1 Орхан Сафаров

Ё.Басхүү 0:1 Ниджат Шихализадзе    Ё.Басхүү 0:0 Орхан Сафаров

Б.Жаргал