Эрүүл мэндийн яамнаас хавьтлын тандалт, хийж буй арга хэмжээний талаар мэдээлэл өглөө.
ХӨСҮТ-ийн судлаач Д.Оюунгэрэл “Халдвар дамжихаас урьдчилан сэргийлэх зорилгоор халдварт өртсөн байж болзошгүй хүмүүсийг тодорхойлох, үнэлэх системт үйл ажиллагааг хавьтлын тандалт гэж нэрлэдэг. Ингэхдээ ойрын болон хоёрдогч хавьтал гэсэн хоёр ойлголтыг авч үзэж болно.
Коронавирусний хувьд эмнэлзүйн шинж тэмдэг эхлэхээс өмнөх цагийн хугацаанд тухайн халдвар авсан хүн вирусийг гадаад орчинд идэвхтэй ялгаруулж байдаг. Мөн эмнэлзүйн шинж тэмдэггүй балархай, хөнгөн хэлбэрийн хүмүүс дийлэнх хувийг эзэлж байна. Үүнтэй уялдуулан ойрын хавьтал гэдэг тодорхойлолтыг гаргаж ирсэн.
Манай улсад дотоодод халдвар тархсанаас хойш нийт 640 гаруй тохиолдол бүртгэгдээд байна. Эдгээрийн ойрын хавьтал 3200 гаруй, хоёрдогч хавьтал болох 21 мянга гаруй иргэдийг илрүүлж, шинжлээд байна.
Ойрын хавьтлыг 24 цагийн хугацаанд илрүүлж, ажиглан тусгаарлах байранд тусгаарлаж, шинжилгээнд давтамжтай хамруулж байна. Хэрэв энэ хугацаанд вирус илрээгүй тохиолдол гэрийн тусгаарлалтад шилжүүлж давтан шинжилгээ хийдэг. Харин эмнэлзүйн шинж тэмдэг илэрсэн тохиолдолд сэижгтэй тохиолдол гэж үзэн эмнэлэгт хэвтүүлж, шинжилгээгээр баталгаажуулдаг.
Иймд иргэддээ хувийн ариун цэврээ сайтар хангаж, маскаа зүүж, шаардлагагүй бол гадагш гарахгүй байхыг зөвлөж байна" гэлээ.
А.Сүх
