Монгол Улсын Ерөнхийлөгчийн сонгууль ойртох тусам одоогийн Ерөнхийлөгч энэ удаагийн сонгуульд өрсөлдөх боломжгүй гэсэн хэсэг байхад  үргэлжлүүлэн хоёр жил хаших ёстой гэж үзэгсэд ч байна. Тухайлбал, УИХ-ын дарга, гишүүн асан, туршлагатай улстөрч  Р.Гончигдорж “Үндсэн хуулийн зүйлчлэлээр  ялгавал 2020 оны тавдугаар сарын 25-ны өдрөөс Ерөнхийлөгчийн бүрэн эрх зургаан жил болж, Ерөнхийлөгчөөр Монгол Улсын иргэн зөвхөн нэг удаа л сонгогдож болохоор болсон.

Тиймээс одоогийн Ерөнхийлөгчийн бүрэн эрх 2023 онд дуусах ба ээлжит сонгууль 2023 оны зургаадугаар сард болох  ёстойг  Үндсэн хууль хэлж байгаа. Тэгэхээр 2021 оны сонгуульд одоогийн Ерөнхийлөгч нэр дэвшиж болно, болохгүй гэх яриа мэтгэлцээн Үндсэн хуулийн бус” хэмээжээ. Энэ нь Ерөнхийлөгч Х.Баттулгын бүрэн эрхийг хоёр жилээр сунгаж, сонгуулийн 2023 онд явуулах учиртайг хэлээд байгаа юм.

УИХ-ын гишүүн асан Р.Гончигдоржийн хувьд Үндсэн хуулийн өөрчлөлтөд дөрөөлөн ийм гаргалгаа гаргах нь зөв. Тэрбээр АН-ын дарга, УИХ дахь АН-ын бүлгийн дарга гээд намдаа үнэнчээр зүтгэсэн, үүнийхээ хариуд УИХ-ын дэд даргаар ажиллаж байсан нэгэн. АН дотооддоо хагаралдаж, хоёр тийшээ харчихсан энэ цагт тулхтай улстөрчийн энэ мэт дэмжлэг хэрэгтэй. Тиймдээ ч хуулийн цоорхойг гярхай овжин ажиглан энэ байтугай гаргалгаа гаргаж ирэх хүн Ерөнхийлөгчийн сонгууль дөхөх тусам ихэснэ. Харин одоогийн Ерөнхийлөгчийн бүрэн эрхийг хоёр жилээр сунгана, сунгахгүй, 2021 онд сонгуулийг явуулна, явуулахгүй гэх маргаан, мэтгэлцээн цаашид  улам өрнөх нь тодорхой болж байна.

У.Тэргэл