Коронавирусний халдвартай холбоотойгоор Баянзүрх дүүргийн 17 дугаар хороо, Баянгол дүүргийн дөрөвдүгээр хороонд хэсэгчилсэн хөл хорио тогтоолоо.
Тодотговол, нэгдүгээр сарын 14-ний өглөөний 06 цагаас нэгдүгээр сарын 16-ны 23 цаг хүртэл дээрх хорооны нутаг дэвсгэрийг хэсэгчлэн хаахаар боллоо.
Энэ хугацаанд хорооны хүн амыг шинжилгээнд хамруулах юм. Баянзүрх дүүргийн 17 дугаар хорооны хувьд нутаг дэвсгэр дээр дөрвөн том шинжилгээний байр ажиллуулахаар болсон.
Тодруулбал, 79 дүгээр сургуулийн ахлах сургууль, хорооны иргэний танхим, 21 дүгээр худагтай гудамжинд зөөврийн шинжилгээний байр, иргэдийн нэрлэж заншсанаар сайжруулсан гудамжинд шинжилгээний байрыг байршуулж, иргэдээс шинжилгээ авахаар юм.
Үүнтэй холбоотойгоор хөл хорионы үеэр 17 дугаар хорооны голын зам буюу Шархадны замаар тээврийн хөдөлгөөн зорчих боломжгүй болж байгаа аж.
Тиймээс төвөөс ирж буй нийтийн тээвэр Эрдэнэтолгойн автобусны буудлаас буцах юм байна. Шархадны замыг хааж буй учир иргэд өөр замыг сонгож зорчихыг албаныхан анхаарууллаа.
Хэсэгчилсэн хөл хорио тогтоох хугацаанд эмийн сан, хүнсний дэлгүүр, шахмал түлшний худалдаа, ундны усны худаг хэвийн ажиллах аж.
Иргэд мэргэжлийн байгууллагын заавар зөвөлгөөг дагаж, өмнө нь коронавирусний шинжилгээнд хамрагдсан байсан ч энэ удаагийн шинжилгээнд заавал хамрагдах ёстой гэдгийг албаныхан зөвлөж буй. Мөн иргэд онцын шаардлагагүй бол гэрээсээ гарахгүй байж, шинжилгээний хариу гартал олон нийтийн газраар явж, иргэдтэй хавьтал болохгүй байхыг зөвлөсөн.
Баянгол дүүргийн 4-р хорооны 20 байрнаас тандалт, илрүүлгийн шинжилгээ авах юм. Тодруулбал дөрөвдүгээр хорооны 1-15, 16, 17, 21, 43, 47 тоот байрны оршин суугчдаас тандалт, илрүүлгийн PCR шинжилгээ авах тул тухайн байруудад дүүргийн онцгой комиссоос хязгаарлалтын хэсэгчилсэн дэглэм тогтоосон юм.
Харин дээрх байршилд үйл ажиллагаа явуулдаг хүнсний дэлгүүр, эмийн сан, эмнэлгийн үйлчилгээ хэвийн явагдана. Оршин суугчид, та бүхэн шинжилгээндээ идэвхтэй хамрагдаж, иргэний үүргээ биелүүлэхийг уриалж байна.
Б.Баатар
