Оройн цагаар айл өрхийн амгалан тайван байдлыг алдагдуулан үймүүлж гүйсэн, орилж хашгирсан хүүхдийг 100 мянган төгрөгөөр торгоно гэсэн мэдээлэл сошиалаар явж, эцэг, эхчүүд ч шүүмжлээд эхэлсэн.

Тэгвэл Зөрчлийн тухай хуулийн 5.5-д “22.00-06.00 цагийн хооронд орон сууцны зориулалттай байр, талбайд бусдын амгалан тайван байдлыг алдагдуулбал буруутай хүнийг 100 нэгж буюу 100 мянган төгрөгөөр, аж ахуйн нэгж, байгууллагыг 1000 нэгж буюу нэг сая төгрөгөөр торгох”  хуулийн заалттай аж.

Энэ дагуу өнгөрсөн 2020 онд гэхэд л 3768 зөрчлийг шалгаж тогтоон,  буруутай 3893 хүн, гурван аж ахуйн нэгж, байгууллагыг нийтдээ 330 гаруй сая төгрөгөөр торгосон байна. Энэ төрлийн хамгийн их  зөрчил Баянгол дүүрэгт гардаг бөгөөд 2021 оны нэгдүгээр сарын 1-нээс өнөөдрийг хүртэлх хугацаанд энэ төрлийн зөрчил гаргасан 334 хүнийг 33 сая төгрөгөөр торгосон байна.

Зөрчлийн хуулийн энэхүү заалт нь дан ганц хүүхдэд хамаарахгүй. Гэртээ бөөгнөрч архидан согтуурдаг, зодолддог, шөнө оройн цагаар барилгын ажил хийдэг зэрэг ч орох юм байна. Мөн дээд, доод талын айлын хүүхдүүд гүйлдээд байна гэх дуудлага цагдаагийн байгууллагад ирэх нь олширчээ. Энэ дагуу цагдаа нар гэрт нь очиж, ар гэрийнхэн, асран хамгаалагч нарт нь анхааруулдаг аж. Харин орой шөнийн цагаар үймүүллээ, гүйлээ гэх дуудлагын дагуу нэг ч хүүхдийн торгоогүй, тэгэх ч боломжгүй аж.

У.Тэргэл