УИХ-ын өнөөдрийн чуулганаар Банкны тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслийг хэлэлцэж байна. Энэ үеэр Д.Ганбат гишүүн зарим зүйлд шүүмжлэлтэй хандсаныг онцлон хүргэе. 

Тэрбээр “Та нар гадаад валютын нөөцийн тухай маргалдаад байх шаардлагагүй. Сүүлийн дөрвөн жилд 100 тонн алт авсан байх. 2015 онд миний бие АМНАТ-ыг 2.5 хувь болгож батлуулж байсан. Үүний хүчинд л ингэж яваа шүү. АН-ын үед гэж тодотгоё.

Банкны тухай хуульд сүүлийн жилүүдэд оролдоод байгаа юм байна. Үр дүн нь сайн, муу хоёр янзаар гарч байгаа.

Саяхан нэг улстөрч банк дампууруулж, 40 сая төгрөгөөр торгуулаад татвар төлөгчдийн нуруун дээр 300, 400 тэрбум төгрөг үүрүүлсэн.

Банкны тухай хуулиар Монголбанкны ерөнхийлөгч АН-ын бүлэг дээр ирж мэдээлэл хийх хэрэгтэй байна. Бидэнд хангалттай мэдээлэл алга. Хоёрдугаарт, санаатай, санамсаргүй юм уу манай бүлгийн гишүүдээс ажлын хэсэгт оруулаагүй байна. Орж ажиллаж, сайн хэлэлцэж байж хийхгүй бол Банкны салбар эдийн засгаа унагах эрсдэлтэй.

Тиймээс АН-ын бүлэг Банкны тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслийг хэлэлцэх асуудлаар тав хоногийн завсарлага авч байна” гэлээ.

А.Сүх