УИХ-ын өнөөдрийн үдээс хойшхи чуулганы хуралдаанаар Банкны тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслийг хэлэлцлээ. Дараа нь Захиргааны ерөнхий хуульд нэмэлт, өөрчлөлт оруулах хуулийн төслийг хэлэлцэж байна.

Б.Энхбаяр: Өчигдөр бид ардчилсан шинэ Үндсэн хуулиа баталсны 29 жилийн ойн өдрийг тэмлэглэсэн. Гэхдээ огт хэрэгжээгүй нэг заалт бий. Тэр нь Үндсэн хуулийн 34.2 дахь заалт. Манай улс парламентын засаглалыг сонгосон. Ерөнхийлөгчийн хуульд нийцээгүй шийдвэрийг УИХ хянаж хүчингүй болгох заалтыг огт бичээгүй. 29 жил шийдвэрийг нь хянаж, хүчингүй болгож байсан тохиолдол байхгүй. Үүнээс болоод сүүлдээ ямар засаглалтай нь мэдэгдэхгүй байдал гарлаа.

Тиймээс Захиргааны ерөнхий хуульд Ерөнхийлөгчийн хэм хэмжээ тогтоосон шийдвэрийг УИХ хянаж үзэхээр зохицуулалт оруулсныг талархан дэмжиж байгаа.

Сайн жишиг гэж үзэж байна. Ер нь Ерөнхийлөгчөөс ямар хэм хэмжээ тогтоосон акт гаргаж байна вэ. Хэдий хугацаанд УИХ-д ирүүлж байх вэ. Үндсэн хуулийн агуулгад шийдвэр гэдэгт бүгдийг багтаачихсан байгаа юм. Уучлал үзүүлэх, одон медальтай холбоотой шийдвэрийг хэлэлцээд байх зохисгүй. Харин шүүгчийг үндэслэлгүйгээр чөлөөлсөн уг асуудлыг хэлэлцэж байх ёстой.

Ажлын хэсэг: Үндсэн хуулийн өөрчлөлтөөс гадна Ерөнхийлөгчид 60 гаруй хуулиар тодорхой эрх хэмжээ шилжүүлсэн. Үүн дээр үндэслэн хэм хэмжээ тогтоосон шийдвэр их гаргаж байгаа. Гэвч УИХ-ын эрх хэмжээ тогтоосон заалтад нийцүүлж зарлигаа гаргаж байна уу гэдэг нь хяналтгүй байна. Тиймээс Захиргааны ерөнхий хуульд нэмэлт, өөрчлөлтөөр оруулсан.

Б.Лхам