УИХ-ын өнөөдрийн үдээс хойшхи чуулганы хуралдаанаар Захиргааны ерөнхий хуульд нэмэлт, өөрчлөлт оруулах хуулийн төслийг хэлэлцэж байна.

Энэ үеэр УИХ-ын гишүүн Т.Аюурсайхан Засгийн газрын шийдвэрийг Захиргааны шүүх хянахгүй гэдэг заалт оруулж байгаад шүүмжилж, үнэн эсэхийг хуулийг төсөл боловруулагчдаас асуусан юм.

Тэгвэл ажлын хэсгээс дараах тайлбарыг өгсөн юм. Тодруулбал, “УИХ-ын улстөрийн шийдвэрийг хэрэгжүүлэх зорилгоор Засгийн газраас гаргасан шийдвэрийг хянахгүй гэж байгаа.

Улстөрийн шийдвэр гэдэгт нь төрийн гадаад, дотоод бодлогыг хэрэгжүүлэх эсвэл УИХ-ын тухайлсан шийдвэрийг салгаж болохгүй Засгийн газрын шийдвэрийг ойлгоно гэж 2019 оны тавдугаар сард өөрчлөлт орсон.

Засгийн газрын гаргаж байгаа шийдвэр бүр улстөрийн шинжтэй. Дэд сайд томилох чөлөөлөх, Засгийн газрын үйл ажиллагааны хөтөлбөрөө хэлэлцэж батлах, хууль тогтоомжийг УИХ-д өргөн мэдүүлэх зэрэг улстөрийн шийдвэрүүдийг Захиргааны шүүх хянах боломжгүй” гэлээ.

Б.Лхам