Шүүхийн тухай хуулийг УИХ өнөөдөр эцэслэн баталж, энэ байгууллагад томоохон дэвшил авчирч буй нь сайшаалтай юм. Тухайлбал,

-Иргэдийн шударга шүүхээр шүүлгэх эрхийг баталгаажуулна

-Шүүхийн бие даасан, шүүгчдийн хараат бус байдал сайжирна

-Хамгийн сайн нь буюу шилэгдсэн нь шүүгч болдог тогтолцоо бүрдэнэ

-Шүүгчид ногдуулах сахилга, хариуцлагын тогтолцоо амилна.

 Хамгийн гол нь шүүх доторх шүүх буюу Сахилгын хороог байгуулсан нь хамгийн том дэвшил гэж хэлж болно. Учир нь, өнгөрсөн 30 жилд шүүгчтэй холбоотой гомдол, маргаан их байдаг ч нэг ч шүүгчийг шалгаж, хариуцлага ногдуулсан нь үгүй. Учир нь, Шүүхийн дэргэдэх Ёс зүйн хороонд шүүгчид л байдаг. Тиймээс иргэд, аж ахуйн нэгж, байгууллага хэчнээн гомдол гаргаад ч хороо нь шүүгчдийнхээ эсрэг шийдвэр гаргаж байсан нэгээхэн тохиолдол ч үгүй юм. Тиймдээ ч амташсан шүүгчид бөөн бөөнөөрөө авлига авч зүрхэлсэн бололтой.

Салхитын мөнгөний ордын авлигын сүлжээ Монгол Улсын Ерөнхийлөгчийн сонорт хүрч, энэ  дагуу 17 шүүгчийн албан тушаалыг түдгэлзүүлэн  шалгаж,  энэ хооронд  зарим нь хил даван оргон зугтсан, амиа алдсан гээд ихээхэн шуугиан тарьсан.  Энэхүү байдал шүүх байгууллагад авлигын сүлжээ аалзны тор шиг хэрснийг, дархлагдсан шүүгчид хэрхэн дураараа авирладгийг нийгэмд тодоор ойлгуулж, хууль боловсруулагчид ч  шүүхэд яаралтай шинэчлэл хэрэгтэйг илүүтэй ухаарч, хуулийн төслийг яаравчлуулсан гэдэг.

У.Тэргэл