УИХ-ын чуулганаар өнөөдөр Шүүхийн багц хуулийг гишүүдийн 96.2 хувийн саналаар эцэслэн баталлаа. Ингээд ажлын хэсгийн гишүүд мэдээлэл өглөө.

Энэ үеэр УИХ-ын гишүүн Б.Энхбаяр “Шүүхийн сахилгын хороо Үндсэн хуулийн өөрчлөлтөөр байгуулагдаж байгаа Үндсэн хуулийн байгууллага. Сахилгын хороо шүүгчийг огцруулах, түдгэлзүүлэх, хариуцлага тооцох эрх бүхий байгууллага гэж заасан. УДШ Шүүхийн ёс зүйн хорооны бүх шийдвэрийг хянаж авч үздэг нь шүүгчид шүүгчээ хаацайлдаг, хамгаалдаг байдлыг бий болгосон. Тиймээс шүүгчдэд хариуцлага тооцдог шүүх нь бие даасан байх ёстой гэж оруулсан. Тиймээс Шүүхийн сахилгын хорооны шийдвэр эцсийнх байна.

Шүүхийн багц хуульд Ерөнхийлөгчөөс 35 хуудас 100 гаруй саналыг ажлын хэсэгт ирүүлсэн. Эдгээрээс 98 хувийн саналыг нь хүлээж авсан.

Нөгөөтээгүүр, Ерөнхийлөгчид Үндсэн хуульд зааснаас бусад бүрэн эрхийг хуулиар олгохгүй гэдэг өөрчлөлт орсон. Энэ утгаар Ерөнхийлөгчийн ШЕЗ болон Шүүхийн сахилгын хорооны томилгоонд оролцох боломж хаагдсан. Одоо хүчинтөгөлдөр мөрдөгдөж байгаа Үндсэн хуулиар Ерөнхийлөгч бүх шатны шүүгчдийг томилох, УДШ-ийн Ерөнхий шүүгчийг томилох эрхтэй" гэлээ. 

Б.Лхам