Хүний амьдралд өвчин зовлон хэлж биш хийсч ирдэг. Мянгад ганц тохиолдох хүнд өвчин туссан ч зүгээр суухыг хүсээгүй өөрийгөө хөгжүүлж, өрхийн үйлдвэрлэл эрхэлж буй Г.Болормаатай ярилцсан юм.
-Та манай уншигчдад өөрийгөө танилцуулахгүй юу. Хэзээнээс эхэлж бие нь чилээрхэж эхэлсэн бэ?
-Намайг Г.Болормаа гэдэг. Хэнтий аймагт төрж, өссөн. Одоо Улаанбаатар хотод амьдарч байна. Би гадаад хэлний багш мэргэжилтэй. 2001 оноос бие өвдөж эхэлсэн. Шинжилгээ хийлгэж, өвчнийхөө оношийг тодорхойлуулах гэж эмнэлгээр их явсан. 2013 онд тархи нугасны хатуурал гэсэн онош тогтоогдож, хэвтэрт ч орж байлаа.
-Мянгад нэг тохиолддог өвчин гэсэн. Бүрэн эдгэрэх боломж бий юу?
-Энэ төрлийн өвчнийг эмчилсэн тохиолдол дэлхий дахинд байдаггүй юм билээ. Бүхий л өвчнийг эмчилж, эдгээж байгаа ч тархи нугасны хатуурлыг хараахан чадахгүй байна. Одоог хүртэл төгс эмчилгээ гараагүй гэсэн үг. Өвчин зовлонг хүн сөхөрч биш сөрж гардаг. Намайг хөл дээрээ дахин босч алхахад хань, аав ээж, найзуудын сэтгэлийн дэм их хэрэг болсон доо.
-Та өвддөг гээд зүгээр суусангүй. Харин ч өөрийгөө хөгжүүлж, юм оёж сурахын хажуугаар өрхийн үйлдвэрлэл эрхэлж байгаа юм билээ?
-2016 оноос эхлэн бие сайжирч эхэлсэн. Эдгэхгүй өвчтэй ч хийж бүтээх хэрэгтэй гэсэн хүсэл намайг хөтөлсөн. Хүүхдийнхээ хувцсыг ханзлаад эсгүүр гаргаад юм оёж сурч байлаа. Хүн ер нь урмаар тэжээгддэг амьтан шүү дээ. Оёж өгсөн хувцсыг өмсөөд ангийнхандаа “Миний ээж хийдэг” гэж хэлээд аяга болон хувцсны уутны захиалга авчихсан ирсэн. Тухайн үед их урамшаад хүн хүсвэл юуг ч хийж, бүтээж чадна гэдгийг ойлгосон. Хотын захад амьдардаг гэрээс гарч чадахгүй учраас оёдол эсгүүрийн сургалтанд суугаагүй ээ. Эмэгтэй хүн бүхэнд оёж, хатгаж, үйл урлах өгөгдөл бий.
-Оёдлын машин доод тал нь 500 мянган төгрөгийн үнэтэй байдаг. Юм оёход нэг биш нэлээд хэдэн машины дамжлага дамжиж хувцас бүтнэ. 2-3 машин худалдаж авахад хүндрэл тулгарсан уу?
-Анх ээжийнхээ гар машинаар оёж сурсан. Дүүргийнхээ Хөдөлмөр халамжийн хэлтэст төсөл бичиж, анхныхаа цахилгаан оёдлын машиныг авч байлаа. Өнгөрсөн онд орлогоо хуримтлуулж байгаад хэрээсний машин худалдаж аваад санаа зовох зүйлгүй үйл урлаж сууна. Хувцас загварын салбарын чиглэлээр мэргэжил эзэмшээгүй учраас сурах зүйл их бий. Цаг ямагт өөрийгөө хөгжүүлэхийг боддог.
-Хэчнээн төрлийн хувцас оёж байна. Ихэвчлэн захиалгаар хийдэг үү?
-Тийм ээ. Захиалгын хувцас оёдог. Үндэсний дээл, монгол цамц, хүүхдийн өмд, цамц, гадуур хүрэм зэргийг өнгө, загварын сонголттой оёж байгаа. Байнгын үйлчлүүлэгчид захиалга өгнө.
-“Ковид-19” гарснаас шалтгаалж, орлого багассан гэсэн. Сардаа хэдэн төгрөгийн орлого олдог вэ?
-Хувиараа хийдэг болохоор сарын орлого харилцан адилгүй. “Ковид-19” гарснаас хойш орлого эрс муудсан. Захиалга өгөх хүн ховордож байна. Бөс барааны дэлгүүрүүд арваннэгдүгээр сараас хойш ажиллаагүй. Материалгүй болохоор ирсэн ганц, хоёр захиалгаа оёход хүндрэл учирч байна.
