Коронавирусний халдвар аваад эмчлэгдэж, эрүүл болсон иргэн Д.Мөнхбатыг цахим орчинд үзэл бодлоо илэрхийлсний төлөө зөрчлийн хуулиар торгохоор болсон талаар бид өмнө нь мэдээлж байсан билээ. Тэгвэл энэ асуудлаар ЦЕГ-ын Нийтийн хэв журмыг хамгаалах, олон нийтийн аюулгүй байдлыг хангах албаны Зөрчил шалгах, мэргэжил арга зүйн хэлтсийн дарга, хурандаа Ч.Чинбат тайлбар өглөө.

Тэрбээр "Энхсаран сувилалд тусгаарлагдаж байгаад халдварт өвчний шинж тэмдэг илэрч эмнэлэгт эмчлүүлж байсан иргэний холбогдох мэдээллийг Эрүүгийн цагдаагийн албаны кибер гэмт хэрэгтэй тэмцэх хэлтсээс цагдаагийн байгууллагын холбогдох нэгжид ирүүлсэн.

Тухайн иргэн тусгаарлах байранд хулганаар дамжиж коронавирус тархсан гэсэн байна. Энэ асуудлыг цагдаагийн алба хаагчид шалгаад Зөрчлийн тухай хуулийн 5.13-ийн 1 дэх хэсэгт заасан коронавируст халдвар буюу аюул, осол гамшгийн үед бусдыг төөрөгдүүлэх худал мэдээлэл тараасан гэж үзээд нэгдүгээр сарын 18-ны өдөр түүнд шийтгэл оногдуулсан. Хэрэг бүртгэлтийн ажиллагаагаар нотлох баримтуудыг бэхжүүлж, үнэлээд шийтгэх оногдуулах үндэслэлтэй гэсэн дүгнэлт гарсан юм.

Тухайн иргэнийг үзэл бодлоо илэрхийлсэнийх нь төлөө арга хэмжээ, хариуцлага тооцсон зүйл байхгүй. Гамшиг, хорио цээрийн үед Зөрчлийн болон Эрүүгийн хуульд олныг төөрөгдүүлэх худал мэдээлэл тараах, бусдын нэр хүндэд халдахыг хориглосон зохицуулалт байдаг. Тодруулбал, Зөрчлийн тухай хуулийн 5.13-ийн 1 дэх хэсэг, Эрүүгийн хуулийн 15.6, 13.14 дэх хэсэгт байдаг.

Шалгалтаар тухайн иргэн зөрчил үйлдсэн нь тогтоогдсон тул хуулийн дагуу шийтгэл хүлээлгэсэн. Шийтгэл хүлээлгэсэн иргэн эс зөвшөөрвөл шүүхэд гомдол гаргах эрх нь нээлттэй" гэв.

Б.Баатар