Ерөнхий сайд У.Хүрэлсүх "Галын шугамд явсан сайд нараа огцруулчихаад өөрсдөө үлдэх нь зохисгүй" гэж үзээд Засгийн газар бүрэн бүрэлдэхүүнээрээ огцрох шийдвэр гаргасныг МАН-ын Удирдах зөвлөл дэмжлээ. Амаржсан эхийг өөр эмнэлэг рүү шилжүүлэхдээ мэргэжлийн ёс зүйн маш том алдаа гаргасныг эсэргүүцсэн энгийн иргэдийн органик жагсаал уг нь УОК, НОК-д тавьсан "Хүнлэг бай" хэмээсэн шаардлага байсан юм.

Засгийн газар, УОК ч энэ дагуу шийдвэрээ гаргаад Шадар сайд болон Эрүүл мэндийн сайд нар хариуцлага хүлээхээр болсноо мэдэгдэж салбарын сайд нар өргөдлөө өгөөд байв.

Харамсалтай нь иргэдийн органик жагсаалыг ирэх Ерөнхийлөгчийн сонгууль угтсан улс төр болгон үймүүлэх оролдлого АН-ын зүгээс, АН-аас нэр дэвших хүсэлтэй байгаа Ерөнхийлөгчийн зүгээс гарсан.

Гэсэн ч Ерөнхий сайд У.Хүрэлсүх Засгийн газрыг бүрэн бүрэлдэхүүнээр нь огцруулах шийдвэр гаргаж, түүнийг нь намынх нь Удирдах зөвлөл дэмжсэн нь энэ төлөвлөгөөг нь тасладуулах шиг болов. Нэг ёсондоо Ерөнхий сайдын гаргасан эл шийдвэр засаглалын хямралаас сэргийлэх улс төрийн эр зориг байв.

С.Сүлд