УИХ-ын гишүүн Ш.Адьшаа, "Үнэн ба зөв" намын дарга А.Отгонбаатарыг өөрийнхөө зөвлөхөөр ажиллуулах болсон талаар бид мэдээлсэн. Тэгвэл энэ нь өчигдрийн жагсаалтай холбоогүй, түүнийг хамгаалахын тулд зөвлөхөөрөө сонгосон гэдгийг Ш.Адьшаа гишүүн хэллээ.   

Тэрбээр "Өчигдөр Сүхбаатарын талбай дээр залуучууд зүрх сэтгэлээрээ нэгдэж, хэн нэгэн улс төрчийн захиалгагүйгээр цугласан. Энэ ажиллагаанд оролцож, хамгийн анх талбай дээр гарч ирж үзэл бодлоо илэрхийлсэн хүн бол А.Отгонбаатар гэдэг залуу. Энэ хүнийг миний зөвлөхөөр ажиллаж байгаа талаарх мэдээлэл хэвлэл мэдээллийн хэрэгслүүдээр гарч байна.

А.Отгонбаатар миний зөвлөхөөр ажиллаж байгаа нь өчигдрийн жагсаал цуглаантай ямар ч холбоогүй. Тэдгээр залуус Засгийн газраас авч хэрэгжүүлж байгаа ажил, үр дүнг эсэргүүцсэн. Гэтэл үүнийг улс төржүүлэх хандлага ажиглагдаж байгаад харамсаж байна. 

Би А.Отгонбаатарыг 10 жилийн өмнөөс мэдэх бөгөөд хамтарч ажиллаж ирсэн. Сарын өмнө А.Отгонбаатар надтай уулзаж, хүнд байдалд, дарамтад байна гэдгээ хэлсэн. Хүчний байгууллага, улс төрчдийн дарамтад байгаа учир хамгаалж өгөөч гэж надаас хүссэн. УИХ-ын гишүүн хэн нэгнийг хамгаалах боломжгүй. Тиймээс өөрийнхөө зөвлөхөөр ажиллуулж, хамгаалах ганцхан боломж л байсан. Жагсаал болохоос өмнө А.Отгонбаатарыг өөрийнхөө зөвлөхөөр томилуулах саналаа өгсөн. Гэтэл өнөөдөр УИХ-ын Тамгын газраас миний албан бичгийг яах гэж, хэний даалгавараар олон нийтийн сүлжээнд байршуулсан гэдгийг ойлгохгүй байна. 

Албан бичигтэй холбоотой жинхэнэ улс төрийн зорилготой зүйл болж байна. Монгол Улсад хүний эрх, үгээ хэлэх эрх чөлөө хаагдмал болжээ. А.Отгонбаатарыг цагдаа, тагнуулын байгууллага шалгаж байгаа гэсэн. Өчигдрийн жагсаал цуглааныг УИХ-ын гишүүн миний бие болон АН-ын зүгээс зохион байгуулаагүй гэдгийг хариуцлагатайгаар мэдэгдье. Ийм бусармаг үйл ажиллагаа явуулж байгаад харамсаж байна" хэмээлээ. 

Б.Баатар