“Үнэн ба Зөв” намын дарга А.Отгонбаатар УИХ-ын гишүүн Ш.Адьшаагийн зөвлөх болсонд ихээхэн шүүмжлэл өрнөсөн. Түүнийг Төв талбай дээр эсэргүүцлээ илэрхийлэн гэрийн халад, шаахайтай гарч ирсний маргааш уг албан тушаалд очлоо, “Талбайд халадтай гараад л албан тушаал” гэх мэдээллүүд гарсан юм. Энэ талаар А.Отгонбаатар өөрийн цахим хуудастаа “Албан бичгийн он сарыг ядаж хараарай.

2020 оны нэгдүгээр сарын 19-ний өдрийн 11 цагийн үед гарсан. Гэтэл дөнгөж амаржсан эмэгтэй болон нярайг хүнлэг бус байдлаар зөөвөрлөсөн бичлэг тухайн өдрийн 19 цагаас хойш гарсан. Би хүртэл 21 цагийн үед мэдсэн. Би яаж тэр эмэгтэйг тэгж шилжүүлэхийг түрүүлж мэдсэн байх вэ. Маргааш өглөө нь би талбай дээр ганцаараа ирсэн.

Энэ тухай Ерөнхий сайд эхлээд иргэдийн органик нэгдэл байсан гэж хэлсэн. Сүүлдээ улс төр болсон гэсэн. Ийм тодорхой зүйл дээр намайг харлуулах гэж хичээж байна. Над руу дайрах гэж өө, сэв эрж байгаа бол хүссэн зүйлээ хий. Би харин УИХ-ын гишүүн Ш.Адьшаагийн зөвлөхийн ажлаас өөрийн хүсэлтээр татгалзаж байна” гэжээ.

У.Тэргэл