УИХ-ын гишүүн, УИХ дахь МАН-ын бүлгийн дарга Д.Тогтохсүрэн отрын малчдаа эргэж, оторлож буй аймаг сумдын удирдлагуудтай уулзалт хийгээд иржээ. Улсын Онцгой комиссоос тодорхой шалтгааны буюу буяны ажил, өвс тэжээл болон хүнс тээвэрлэх зэрэг цөөхөн шалтгаанаар хотоос гарахыг зөвшөөрч буй.

Тэгвэл Д.Тогтохсүрэн гишүүн хүнс болон тэжээл ачсан автомашины зөвшөөрлөөр хотоос гарч, эрүүл ногоон бүс болсноо зарлаад байгаа аймгууд руу "айлчлаад" ирсэн нь олны шүүмжлэлийг дагуулж байгаа юм. 

Тодотговол, Д.Тогтохсүрэн гишүүн Говьсүмбэр, Дорноговь, Хэнтий, Сүхбаатар, Дорнод, Өмнөговь, Дундговь аймгийн сумдад оторлож буй Өвөрхангай аймгийн малчдаа эргэж, өвс тэжээл, хүнс, эмийн багцын дэмжлэг үзүүлж, оторлож буй бүс нутгийн удирдлагуудтай уулзаад ирсэн талаараа мэдээлсэн байна.

Улаанбаатар хот коронавирусний голомт болоод буй учир бусад аймаг сумдад халдвар тархаахгүйн тулд УОК Улаанбаатараас гарах хөдөлгөөнийг хязгаарласан хэвээр байгаа юм. Гэтэл МАН-ын бүлгийн дарга аймгуудаар "зугаалж", халдвар хамгааллын дэглэмээ ч мөрдөхгүй айлчилсан нь эрсдлийг нэмэгдүүлж байна. Дайны хажуугаар дажин гэгчээр зудны хажуугаар коронавирусний халдвар тараачихвий хэмээн иргэд шүүмжилж байгаа юм. 

Хэдийгээр тэрбээр PCR шинжилгээнд хамрагдаж, зохих журмын дагуу орон нутгийг зорьсон хэмээж байгаа ч отрын малчидтай уулзахдаа амны хаалт ч үгүй хамрын тамхи зөрүүлэн зогссон нь ийнхүү шүүмжлэл дагуулаад байгаа юм. 

Сонгогдсон тойргийн ард иргэдээ эргэж, "услах" нь гишүүний хийх ажил ч гэлээ цар тахлын үед халдвар хамгааллын дэглэмээ мөрдөх нь хүн бүрийн үүрэг гэдгийг эрхэм гишүүн ухамсарлах зүйтэй болов уу.  

Р.Алтан