УИХ-ын гишүүн Б.Пүрэвдоржийн өргөн мэдүүлсэн Онцгой албан татварын тухай хуульд нэмэлт өөрчлөлт оруулах хуулийн төслийг УИХ-ын чуулганаар хэлэлцэх эсэхийг хэлэлцэж эхэллээ. Гол зорилго нь хуурамч шатахууныг зогсоохын тулд нефтийн нэмэлт бүтээгдэхүүн болох керосин, нафтод ногдуулах онцгой албан татварыг нэмэгдүүлэх, ингэснээр төсвийн орлого нэмэгдэж, иргэдийн эд хөрөнгийг давхар хамгаалах юм байна.

Б.Пүрэвдорж гишүүн энэ талаар “Керосиноор дээр үед лаа асаадаг, нафтог бол тракторт хэрэглэдэг. Энэхүү хоёр бүтээгдэхүүнийг жилд 200 мянган тн-оор нь оруулж ирж байна. Манай улсад ийм хэмжээний хэрэгцээ, шаардлага байхгүй. Эдгээр дайвар бүтээгдэхүүнийг дизель түлштэй хольж, борлуулдаг. Эдгээрийн онцгой татварыг нэмэгдүүлснээр шатахууны үнэд өөрчлөлт орохгүй. Хуурамч шатахуун үйлдвэрлэж, ашиг олдог гурван байгууллага бий. Тэд жилдээ тэрбумын орлого олдог” гэв. 

У.Тэргэл