Коронавирусний халдварын нэг, хоёрдугаар хавьтлын улмаас эсвэл гадаадаас ирээд шууд тусгаарлалтад орсон, мөн халдварын улмаас эмнэлэгт эмчлүүлээд гарсан иргэд амаа хамхиж буй нь Зөвлөмжийн баталгааны маягтыг бөглүүлдэгтэй холбоотой аж. Уг маягтад тэгвэл, ингэвэл Зөрчлийн тухай хуулиар торгоно. Тодруулбал, хувь хүнийг 50-200 мянга, хуулийн этгээдийг 150 мянгаас нэг сая 500 мянган хүртэлх төгрөгөөр торгоно. Эсвэл  1-5 жил хүртэлх хугацаагаар хорино гэх олон заалтыг оруулж өгчээ. Тиймдээ ч тусгаарлалтаас, эмнэлгээс гарсан иргэд элдэв зүйлийг ярьж байж торгуульд унахвий гэхээс болгоомжлон, хэвлэлийнхнээс дөлөх болсон нь ийм учиртай аж.

Зөвлөмжийн баталгааны маягтыг эхээр нь хүргэе.

Зөвлөмжийн баталгааны маягт

Овог, нэр ........................................

Тус зөвлөмжийг зөрчсөн тохиолдолд дараах хариуцлагыг хүлээлгэнэ

Гамшгийг хамгаалах тухай хуулийн 37.2.1 Гамшгаас хамгаалах хууль тогтоомж, эрх бүхий байгууллага, албан тушаалтнаас гаргасан шийдвэрийг биелүүлэх, 3.2.7 эрх бүхий байгууллага албан тушаалтны гаргасан шийдвэрийг зөрчсөний улмаас гарсан зардлыг хариуцах.

1.Зөрчлийн тухай хуулийн 8.13 дугаар зүйл. Гамшгаас хамгаалах тухай хууль зөрчих гамшиг аюулт үзэгдэл, осол, аюул, гамшгийг эрсдэлийн талаар олон нийтийг төөрөгдүүлсэн мэдээ, мэдээлэл түгээсэн эсхүл нэр бүхий байгууллагаас тогтоосон хорио цээр, хөдөлгөөний хязгаарлалтын дэглэмийг зөрчсөн бол хүнийг нэг зуун тавин нэгжтэй тэнцэх хэмжээний төгрөгөөр, хуулийн этгээдийг нэг мянга таван зуун нэгжтэй тэнцэх хэмжээний төгрөгөөр торгоно.

2.Торгох шийтгэлийн хэмжээ  нь арваас хорин мянган торгуулийн нэгжтэй тэнцэх хэмжээний төгрөг, хуулийн этгээдэд нэг зуугаас хоёр зуун мянган торгуулийн нэгжтэй тэнцэх хэмжээний төгрөг байна.

3. Энэ хуулийн 2 дахь хэсэгт заасан нэг торгуулийн нэгж (цаашид нэгж гэх) нь нэг мянган төгрөгтэй тэнцүү байна.

Зөрчлийн тухай хуулийн 5.18 дугаар зүйл. Онц байдлын тухай хууль зөрчих

1. Онц байдал тогтоосон шийдвэр, онц байдал үеийн онцгой арга хэмжээ, нэмэлт онцгой арга хэмжээ, онцгой арга хэмжээг тогтоох, хэрэглэх хүрээ заагийн хязгаарлалтыг зөрчсөн бол хүнийг тавин нэгжтэй тэнцэх хэмжээний төгрөгөөр, хуулийн этгээдийг таван зуун нэгжтэй тэнцэх хэмжээний төгрөгөөр торгоно.

Эрүүгийн хуулийн 15.6 дугаар зүйл. Бусдын амь насанд аюул учруулж,болзошгүй халдварт өвчин, дархлал хомсдолын вирусийг бусдад зориуд халдаасан бол нэг жилээс таван жил хүртэлх хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.

Цаашид  оршин суух газрын хаяг..............................

Холбоо барих утасны дугаар .....

Яаралтай холбоо барих утасны дугаар............

Баталгаа гаргасан иргэний гарын үсэг ..............

Холбогдох байгууллагууд худал мэдээллийг нийгэмд цацахаас болгоомжлон сэрэмжлүүлэх нь зүйн хэрэг. Гэвч Үндсэн хуулийн дагуу үзэл бодлоо илэрхийлж, санаа бодлоо хэлэх, дуугарах, буруу зөвийг анхааруулах бүрд торгоно, хязгаарлана, хорино гэх нь  хүний эрхэд дэндүү халдаж байгаа хэрэг бус уу. Үүгээр иргэдийн амыг өнөөдөр хамхиж байгаа ч маргааш илрэх нь тодорхой юм.

У. Тэргэл