Монгол Улсын Ерөнхийлөгчийн хэвлэлийн төлөөлөгч О.Батханд нэгэн мэдэгдлийг Төрийн ордны индэр дээрээс хийв. Түүнийг Ерөнхийлөгчтэй холбоотой мэдээлэл хийх нь. Улс төр ид өрнөж  байхад арга ч үгүй биз. Өмнөх өдрийн чуулганд Монгол Улсын Ерөнхийлөгч үг хэлж, ноцтой мэдээлэл хийснийг ч хэлэх үү гэсэн бодолтойгоор хэвлэлийнхэн очсон.

Гэтэл  тэрбээр  “Ерөнхийлөгч дуудлаа, жагсаал зохион байгуулсан хүмүүсийн дунд чиний нэр явна гэлээ. Тэгээд би мэдэгдэл хийхээр шийдлээ” хэмээн ховын чанартай асуудлыг өндөр дуугаар ярьж, бусдын сошиал дахь постыг уншиж, талбай дээр очсон олны танил шүгэл үлээгчдийг зурагтай нь танилцуулав.  Бүр тагнуул, цагдаа, хүчний  байгууллагад боломж олгоё, миний бүх цахим хаягийг хоёр жилийнхныг нь хамаагүй шалгаарай, би тэр жагсаалд чинь оролцоогүй шүү хэмээн омогдов.

Төрийн ордны индэрт хувь хүн өөрийнхөө талаар зүгээр нэг ховын чанартай зүйл ярьж зогсох нь хэр зохимжтой юм бэ. Төрийн түшээд улс эх оронтой холбоотой гаргасан чухал шийдвэр, хууль тогтоомжийг мэдээлдэг атал одоо Төрийн ордонд албан тушаал эрхэлдэг хэнбугай нь ч индэр ашиглан хувийн үзэл бодлоо илэрхийлж, ашиг сонирхлоо хамгаалж болох нь.

У. Тэргэл