Н.Номтойбаяр нарт холбогдох хэргийг Улсын Дээд шүүх хяналтын шатны хуралдаанаараа өнгөрсөн баасан гарагт хэлэлцээд, анхан шатны шүүхээс оноосон 5,5 жилийн хорих ялыг нэг жил болгон бууруулж, төрийн албан тушаал хаших эрхийг хоёр жилээр хассан билээ.  Бүтэн дөрвөн цаг шүүгчид зөвлөлдөн шийдвэрээ гаргасан ба Н.Номтойбаярыг суллачих болов уу гэсэн найдлага олон хүнд байсан юм.

Гэвч олон жилийн ялыг бууруулсан нь бас завшаан юм. Учир нь, Н.Номтойбаярыг 2020 оны тавдугаар сарын 28-ны өдөр саатуулсан ба энэ цагаас хойш найман сарын хугацаа өнгөрсөн. Шүүгч нийт ялын 50 хувийг эдэлсэн тохиолдолд магадлангаар суллах эрхтэй ба Н.Номтойбаярын хувьд ийм боломж гарч ирж буй юм. Шүүх хуралдааны дараа түүнийг цагдаа нар авч гарахад тэрбээр “Монголын хууль гууль болжээ” хэмээсэн билээ.