Хуулийнхны нэгэн бичлэгийг мэдээллийн сайтууд ил болгосон. Энэхүү бичлэгт байгаа Х.Идэр гэж хэн бэ?

МАНАН бүлэглэлийн хамгаалагч, “хонгил”-ын шүүгч гэгддэг Хувьтөгөлдөрийн Идэрийг Монгол Улсын Ерөнхийлөгч асан Ц.Элбэгдорж 2014 оны долоодугаар сард одоогийн нийслэлийн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүгчээр томилж байв. Түүний аав Д.Хувьтөгөлдөр 1996-2000 онд АН-аас УИХ-ын сонгуульд өрсөлдөн сонгогдож байв. АН-ын Хяналтын хорооны дэргэдэх Ёс зүйн хороог даргалж байсан түүнийг Ц.Элбэгдоржийн ойрын хүмүүсийн нэг гэдэг.

Шүүгч Х.Идэрийн ах Х.Тамир мөн хуульч. Гэвч тэрбээр хар тамхи, авлигын хэрэгт холбогдон байнга л дуулиан тарьж явдаг нэгэн. 2017 онд Тээврийн прокурорын газрын хяналтын прокуророор ажиллаж байхдаа хар тамхи хууль бусаар олж авсан, тээвэрлэсэн, худалдан борлуулахаар завдсан хэрэгт холбогдож, 15.8 сая төгрөгийн авлигын хэрэг, эцэстээ өмгөөлөгчтэйгээ хамт хар тамхины хэргээр дахин баривчлагдан ял сонсож байсан юм.

Х.Идэр шүүгчийн хувьд нийгмийн анхааралд орсон олон хэргийг шийдвэрлэсэн ч байнга л хэл ам дагуулж ирсэн байдаг. Тухайлбал, Эрдэнэтийн 49 хувийг төрийн мөнгөөр худалдан авсан байж болзошгүй ХХБ-ны Төлөөлөн удирдах зөвлөлийн дарга Д.Эрдэнэбилэг, Гүйцэтгэх захирал О.Орхон, Ц.Пүрэвтүвшин нарыг 2019 оны гуравдугаар сарын 6-ны орой Сүхбаатар, дүүргийн шүүгч Х.Идэрийн захирамжаар сулласан байдаг. Тухайн үед “МАНАН” бүлэглэлийн талд ажиллаж, Монгол Улсын Ерөнхийлөгч асан Ц.Элбэгдоржийн заавраар сулласан хэмээх хардлага нийгэмд хүчтэй өнрөж байсан билээ.

“Шударга тав” гэгдэж байсан ЗГХЭГ-ын дарга (хуучнаар) Л.Оюун-Эрдэнэ, УИХ-ын гишүүн Ж.Батзандан, Т.Аюурсайхан, Х.Нямбаатар, Л.Болд нар  шүүгч Х.Идэрт хариуцлага тооцуулахаар Монгол Улсын Ерөнхийлөгч Х.Баттулга, АТГ-ын дарга Х.Энхжаргал, Шүүхийн ерөнхий зөвлөлийн дарга Н.Лүндэндорж, Шүүхийн ёс зүйн хорооны дарга Н.Эрдэнэцогт нарт хандсан ч тодорхой хариу өгөөгүй байдаг. Мөн Х.Идэр нь Ерөнхий сайд асан Н.Алтанхуягийн зөвлөх Л.Гансүх нарт холбогдох хэргийг шийдвэрлэх үед Н.Алтанхуяг болон шүүгдэгч Л.Гансүх нар “Х.Идэр шүүгч АТГ-т барьцаалагдсан” гэдгийг хэлж байсан удаатай.

Хамгийн сүүлд гэхэд л Ерөнхий сайд асан Ж.Эрдэнэбат нарт холбогдох хэргийг шүүх хуралдааныг шүүгч Х.Идэр даргалан явуулсан. Ингэхдээ тэрбээр Ж.Эрдэнэбатыг 10 тэрбумын барьцаа байршуул. Эс бөгөөс цагдан хорино хэмээн шүүхийн практикт байгаагүй аргаар  тулган шаардаж, санасандаа хүрч байв.

Б.Баасанцогт гэж хэн бэ?

Үндэсний аюулгүй байдлын зөвлөлийн нарийн бичгийн дарга А.Гансүх нь Зам тээврийн сайдаар ажиллаж байхдаа Б.Баасанцогтыг 2012 онд МИАТ-т анх ажилд оруулж байсан гэдэг. Тэрбээр 2010 онд согтуугаар автомашин жолоодож, Баянзүрх дүүрэгт гарцан дээр осол гаргаснаас бусдын амь нас хохирсон. Энэ хэрэг тухайн үед “ТВ 9”  телевизээр гарч, нэлээд шуугиулж байсан тухай мэдээлэл байна. Энэ тухайд эргэж нягтлан мэдээлэх болно.  

Шүүгч Д.Отгонбаатар гэж хэн бэ?

 Монгол Улсын Ерөнхийлөгч Х.Баттулга сар гаруйхны өмнө зарлиг гаргаж, анхан болон давж заалдах  шатны шүүхийн шүүгчдийг томилж байсан билээ. Тэдний дунд Эрүүгийн хэргийн анхан шатны шүүгчээр гурван хүнийг  томилж байсны нэг нь шүүгч Д.Отгонбаатар аж. Тэрбээр Говь- Алтай аймгийн харьяат бөгөөд Булган аймгийн Эрүүгийн хэргийн анхан шатны шүүгчээр томилогдоод нэг сар ч болоогүй юм байна.

У.Тэргэл