Дэлхий нийтээр цар тахалтай нүүр тулаад жил гаруйн хугацаа үлдлээ. Эдийн засаг хумигдсан энэ үед улс бүр бодлого гаргаж эдийн засгаа сэргээх арга хэмжээ авч байна. Манай улсад ч ялгаагүй шаардлагагүй зардлаа танах, тэвчих, ААН-үүдээ дэмжих, иргэдийнхээ орлогыг хамгаалахаар Засгийн газраас 10 их наядын гурван жилийн цогц хөтөлбөр хэрэгжүүлэхээ танилцуулаад буй. 
Үүний тулд халдвараа "шүүрдэх" 12 хоногийн хатуу хөл хорио тогтоож, цаашид аль болох хөл хорио тогтоохгүй хэмээн мэдэгдсэн. Ингэх нь ч аргагүй. Учир нь удаан хугацааны хөл хорионы улмаас хэчнээн мянган иргэд ажил, орлогогүй болж, ААН-үүд “мод”-оо барьж байна. 
Нөхцөл байдал хүндэрсэн энэ үед аймгуудын Засаг дарга нар төсөвтөө хэт үрэлгэн байна. Ер нь дарга л болвол үнэтэй машинаар гангардаг гэдэг ойлголт бий болж.

Саяхан гэхэд Өмнөговь аймгийн Засаг дарга 210 саяын автомашины тендер зарласан гэх. Мөн Булган аймгийн Засаг дарга ланд-200 маркийн авто машины 210 гаруй сая төгрөгийн тендер зарласан гэх асуудал цахим сүлжээнд цацагдсан. 

Нэг дарга солигдоод л нэг машин аваад байвал төсөв юу болох вэ. Өмнө нь хүртэл Орхон аймгийн Засаг даргын ярьж буй бичлэг цахим сүлжээнд тархсан. Тодруулбал,  “Орхон аймгийн Засаг даргын орлогчийнх нь 470 машин муудсан. Одоо приус маркийн автомашин унаж байгаа. 98 сая төгрөгөөр шинэ машин авч өгнө. Орлогчоо приус маркийн авто машинаар явуулж чадахгүй” гэсэн байдаг. 
Хөл дүүжилж л байвал приус машин байсан ч яадаг юм. Дарга л болвол үнэтэй машинаар гангардаг гэдэг ойлголтыг хэзээ, яаж халах вэ манай улс.

Б.Лхам