МАН-ын дарга У.Хүрэлсүх Ерөнхий сайдын албан тушаалаас өөрийн хүсэлтээр огцроод сар илүү болж байна. У.Хүрэлсүх буухдаа Ерөнхийлөгч Х.Баттулгын маш ноцтой мэдэгдэл хийсэн.

Тэрбээр “Монгол Улсын шүүх прокурорын байгууллага хараат бус байгаасай гэж хүсдэг. Би ҮАБЗ-ийн хурал дээр гишүүдэд болон холбогдох хүмүүст хэлж байсан. Наад албан тушаалууд чинь мөнхийн биш шүү. Та бүхэн хэзээ нэгэн цагт төрийн өмнө шалгагдана шүү. ҮАБЗ хэзээ ч хууль зөрчиж болохгүй, Ерөнхийлөгч өө. Хэрэв та бид нар хууль зөрчвөл энэ Монголын төрд хууль биелүүлдэг газар үгүй болно шүү гэдгийг удаа дараа хэлсэн, сануулсан.

З.Энхболд даргыг Тамгын газрын дарга байхад нь удаа дараа сануулж байсан. Одоогийн шинэ залуу дарга байхад ч би удаа дараа сануулж байсан. ҮАБЗ-ийн ажлын албаны дарга А.Гансүхэд удаа дараа сануулж хэлсэн.

Би цаашид энэ ажлыг өгснийхөө дараа Монгол Улсын хууль дүрэм хэрхэн яаж зөрчигдөж байсан талаар, Монголын шүүх прокурорын байгууллагад яаж дарамт шахалт болдог байсан талаар баримттай ярина” гэсэн юм. Уг нь 2017 оны намраас хойш Ерөнхийлөгч Х.Баттулга, Ерөнхий сайд У.Хүрэлсүх хоёрыг улс орны олон том ажил дээр хамтарсан сэдэл, шийдэл гаргаж, түүнийгээ хэрэгжүүлж ирсэн гэж олон нийт ойлгодог. Төмөр замын төсөл, тэтгэвэр тэглэсэн... гээд олон ажил дурдаж болно доо.

Энэ байдлыг шүүмжилж буй хүмүүс “Монгол Улс хоёр Ерөнхий сайдтай юм шиг ажиллаж байна. Ерөнхийлөгч Ерөнхий сайдын ажлыг булаалдаж байна” гэдэг байлаа. Харин сар гаруйн өмнө У.Хүрэлсүх дээрх үгийг хэлснээс хойш хариултгүй өнөөг хүрсэн юм. Гэтэл сүүлийн хэдэн өдөр шүүх, хуулийнхантай холбоотой таагүй мэдээлэл гарч, бичлэг цацагдах боллоо.

Нэр бүхий шүүгчдийг орон сууцанд цуглуулж “ёс зүйгүй арга хэмжээ” зохион байгуулсан гэгдээ байгаа өмгөөлөгч Б.Баасанцогтын талаар ч янз бүрийн мэдээлэл хуурай өвсний гал шиг газар авч байна.

Түүнийг Ерөнхийлөгч Х.Баттулга болон ҮАБЗ-ийн нарийн бичгийн дарга А.Гансүхтэй холбоотой гэх мэдээлэл ч хэвлэлүүдээр гарлаа. Гэхдээ ҮАБЗ-ийн ажлын албанаас “Б.Баасанцогт манайд хамаагүй” гэсэн мэдэгдлийг хийжээ. Харин Ерөнхийлөгчийн зүгээс одоогоор тайлбар хэлээгүй байна. Гэхдээ Б.Баасанцогт болон шүүгч нарын энэхүү “дотно” харилцаа нь өөрөөр “орчуулагдаад” эхэллээ.

Өөрөөр хэлбэл, У.Хүрэлсүхийн 2021 оны 1 сарын 21-нд хэлсэн үг, Б.Баасанцогт, шүүгч нарын 2021 оны 1 сарын 20-ны бичлэг сэлттэй очиж холбогдож, улмаар Х.Баттулга, У.Хүрэлсүх хоёр Шүүхээс болж зам салсан уу гэх асуудал улс төрийн хүрээнд яригдаж байна.

 Л.Амарсанаа