Ерөнхий сайд Л.Оюун-Эрдэнэ КОВИД-ын эсрэг вакцины анхны тунг хийлгэж, Монгол Улсад дархлаажуулалт эхэллээ. Тэрбээр ард иргэдээ уриалж, хамгийн эхний коронавирусийн вакциныг өөртөө тариулахаа илэрхийлээд байсан бөгөөд ийнхүү дархлаажуулалтад хамрагдлаа.
Ерөнхий сайд Л.Оюун-Эрдэнэ "Коронавирусийн эсрэг вакцины хамгийн эхний тунг хийлгэлээ. "Нэг өрх Нэг шинжилгээ" амжилттай болж, халдварын голомтуудыг илрүүлж чадлаа. Энэ хүрээнд хүчин зүтгэсэн нийт төрийн албан хаагч, дэмжиж ажилласан ард түмэндээ баярлалаа. Тиймээс ч өнөөдөр вакцинжуулалтын ажил ийнхүү эхэллээ. Энэ ажилд Ерөнхий сайд асан У.Хүрэлсүх нарын оролцоо их байсныг энд дурдах нь зүйтэй. Мөн вакцин хандивласан БНЭУ, БНХАУ-ын Засгийн газар, Элчин сайд нарт талархаж байна.
Өнөөдөр миний бие "АстраЗенека" вакцины анхны тунг хийлгэлээ. Тиймээс ч нийт ард иргэдээ вакцинжуулалтанд идэвхтэй хамрагдахыг уриалж байна. Ингэж байж бид хэвийн амьдралдаа эргэн орж, хүнд цаг үеийг даван туулах болно" хэмээлээ.
Монгол Улс хүн амынхаа 60 хувийг коронавирусийн эсрэг вакцинжуулалтад хамруулахаар төлөвлөсөн. Одоогоор БНЭУ-аас 150 мянган хүн тун АстраЗенека вакцин, БНХАУ-аас 300 мянган хүн тун Синофарм вакциныг хүлээн аваад байгаа билээ.
АстрЗенека вакциныг нэг хүнд хоёр тунгаар хийх учир 150 мянган хүн тун гэдэг нь 75 мянган хүнийг дархлаажуулна. Харин БНХАУ-аас ирсэн Синофарм вакциныг ДЭМБ хүлээн зөвшөөрсний дараагаар хүн амаа дархлаажуулна гэдгийг Эрүүл мэндийн сайд мэдээлсэн.
Дархлаажуулалтад эхний ээлжинд төр, хувийн хэвшлийн эрүүл мэндийн байгууллагын 56 мянган ажилтан, КОВИД-19 халдварын эрсдэлтэй нөхцөлд ажиллаж буй цагдаа, онцгой төрийн албан хаагчдыг хамруулах юм.
Б.Баатар
Сэтгэгдэл (2)