Хатуу хөл хорио тогтоон гэр бүлээрээ гэртээ байгаа энэ үед бага насны хүүхдүүд галд өртөн амиа алдах харамсалтай осол гарсаар л байна. Дэндүү хайнга, тоомжиргүй эцэг, эхчүүдийн буруугаас бид хэчнээн балчир үрсээ “галд” өргөх вэ. Өчигдөр гэхэд л Баянхонгор аймагт 3,7 настай хоёр хүүхэд гэртээ галд өртөж, амиа алдав. Цаашлаад,
-Сонгинохайрхан дүүргийн Нарангийн голд гэртээ цоожтой үлдсэн хоёр айлын 3-7 насны дөрвөн хүүхэд галын улмаас амь насаа алдав. Тус хашаанд хоёр айл амьдардаг бөгөөд хэрэг гарсан өдөр хүүхдүүдээ нэг гэрт нь цоожлоод ажилдаа явсан хойгуур энэхүү харамсалтай осол болжээ.
-Баянзүрх дүүргийн XXYIII хороо, Хужирбулангийн нэгдүгээр хэсгийн гуравдугаар гудамжинд 4 настай эмэгтэй А, 6 настай эрэгтэй А нар галд өртөж нас барсан.
-Хан-Уул дүүргийн XII хороо, Зээлийн барилгын 13 дугаар гудамжинд нэг айлын 1-5 насны гурван хүүхэд галд өртөж, эндэв.
-Сонгинохайран дүүрэг XXXV хороо, “Орбит”-ын ... гудамжинд таван ханатай гэр шатаж, нэг гэр бүлийн дөрвөн хүүхэд эндлээ. Галд 7,5 болон 2 настай эрэгтэй, 6 настай нэг охин өртжээ.
-Хан-Уул дүүргийн IX хороо, Буянт-Ухаагийн 23 дугаар гудамжны задгайд айл шатаж, дөрвөн настай хүү, ихэр хоёр дүүгийн хамт галд амиа алдлаа.
Нэг гэр бүлийн төдөн хүүхэд галд амиа алдлаа гэх гол харлаж,зүрх зүсмээр ийм ослын тоо буурахгүй байна. Эцэг, эхчүүдэд цочроо өгөх болов уу гэсэн үүднээс хэвлэл, мэдээллийнхэн энэ тухай анхааруулж, сэрэмжлүүлсээр ирсэн. Гэвч 2020, 2021 онд ОБЕГ-т галын дуудлага өнгөрсөн оны мөн үеийнхээс буурсан ч харамсалтай нь, гал түймэрт өртөж амь насаа алдсан хүний, тэр дундаа хүүхдийн тоо нэмэгдсэн байна.
У.Тэргэл
