Монгол Улсын Ерөнхий сайд Л.Оюун-Эрдэнэ Монгол Улсад орж ирсэн коронавирусийн вакцины анхны тунг хийлгэсэн. Тэрбээр үеэр "Элэг нэгт ахан дүүсээ шинэ Засгийн газар ажлаа аваад 25 хоног болж байна. Бид шинэ бодлого дэвшүүлэн ажиллалаа. Монгол Улс улаан бүсээс шар бүсэд шилжиж байна. Нийт ААН-ийн 95 хувь нь амьдралын хэвийн горимд шилжиж байна. Тулж ирсэн сорилтыг хамтаар даван туулдаг жишээг бид дахин харууллаа. Хөл хорионы үеэр төр засгийнхаа шийдвэрийг биелүүлсэн ард иргэд, хамтран ажилласан төрийн нийт албан хаагч нартаа баярлалаа. "Нэг өрх нэг шинжилгээ"-г хийснээр өнөөдөр бид хаана байгаа, хаашаа явахыг заасан суурь боллоо.

Хөл хорио шинжилгээгээр мөн бид вакцинжуулалтын суурийг тавьж чадлаа. Вакцинжуулалт Монгол Улсад энэ цагаас эхэлж байна. Ази тивдээ вакцинжуулалтыг эхлүүлсэн улсуудын нэг болж чадлаа. Вакциныг ийнхүү шуурхай авахад Ерөнхий сайд асан У.Хүрэлсүхийн хийсэн яриа, хэлэлцээ чухал байлаа. Мөн вакцинжуулалт нийлүүлэхэд гүн туслалцаа үзүүлсэн эрхэм элчин сайд нарт талархаж байна. Засгийн газар богино хугацаанд 18-аас дээш насны иргэдээ вакцинжуулах ажлыг шуурхай зохион байгуулна. Вакцинжуулалт сайн дурын үндсэн дээр явагдах хэдий ч цар тахлаас, аюулт өвчнөөс хамгаалах ганц арга нь вакцинжуулалт гэдгийг хэлэх нь зүйтэй. 

Вакцинжуулалт эхэлснээр эрүүл мэндээ хамгаалж, эдийн засгаа сэргээх үйл явц эхэлж байна. Монголчууд бид эрүүл амьдралын хэв маягт шилжин амьдрах хэрэгтэй боллоо. Ажилчдадаа вакцинжуулах тал дээр хувийн хэвшил Засгийн газартай хамтран ажиллаарай. Монгол Улсын эдийн засгийн төлөө хүн хоорондын зай барьж, амны хаалтаа зүүх хэрэгтэй. Бид ингэж чадвал хаагдсан сургууль, хаагдсан бизнес, хаагдсан хилээ, хаагдсан аз жаргалтай амьдралын хэв маягтаа шилжиж орно" гэлээ. 

Б.Баатар