Монгол Улсын Ерөнхийлөгч нийт шүүгчдийг  томилох, чөлөөлөх халдашгүй бүрэн эрхтэй. Тиймдээ ч түүнийг шүүгчдийн өргөдлийг түрүүлж авч, өөрийнх төлөө ажиллана гэх амыг нь авч байж баталгаажуулдаг. Төрийн ордны гуравдугаар давхарт шүүгч ирж хэнд, хэдэн жилийн ял оноохыг Ерөнхийлөгчөөс асууж, шийддэг тухай ч Хууль зүйн сайд чуулганы танхимд ам алдсан удаатай.

Хатуу хөл хорионы үеэр хуулийнхан бөөнөөрөө цуглан, нэгнийдээ архидан согтуурч, биеэ үнэлэлт зохион байгуулсан хэрэгт “унаж”, хэрэг бүртгэлийн ажиллагааг хийн, прокурорт эрүүгийн хэрэг үүсгэн шалгах саналыг хүргүүлээд байгаа. Энэ тухай ЦЕГ-ын Хэвлэл мэдээллийн төвийн дарга Б.Баатархүү хэвлэлийнхэнд албан ёсны мэдээлэл өгсөн билээ.

Тэгвэл Монгол Улсын Ерөнхийлөгч Х.Баттулга сар гаруйхны өмнө буюу нэгдүгээр сарын сүүлчээр зарлиг гаргаж, анхан болон давж заалдах  шатны шүүхийн шүүгчдийг томилсон билээ. Тэдний дунд Эрүүгийн хэргийн анхан шатны шүүгчээр гурван хүнийг  томилж байсны нэг нь шүүгч Д.Отгонбаатар юм. Түүнийг Булган аймгийн Эрүүгийн хэргийн анхан шатны шүүгчээр томилсон бөгөөд ажлаа аваад нэг сар ч болоогүй байхдаа хуулийнхны дээрх бичлэгт нэр, дүрс нь үлдсэн юм.

Мөн Сүхбаатар, Чингэлтэй, Баянзүрх дүүргийн Эрүүгийн хэргийн анхан шатны шүүгч Х.Идэр гэхэд л дүрс бичлэгт орсон эрхмүүдээс нэр хүндээрээ хамгийн “бохир” нь. Гэвч тэрбээр өдгөөг хүртэл тэсч үлдсэн нь  “Хонгил”-ын шүүгч гэх нэр зүүсэнтэй нь холбоотой аж. Тодруулбал, Ерөнхий сайд асан Ж.Эрдэнэбатаас арван тэрбумыг нэхэж увайгүй загнасан бол “Нүүрсний” гэх хэргийн Л.Гансүхэд холбогдох хэргийг шүүхэд Х.Идэр шүүгчийн ашиг сонирхлын зөрчилтэй хэмээн өмгөөлөгч Ц.Баасандорж нь гомдол гаргаж байсан гээд тоочвол бишгүй. 

Монгол Улсын Ерөнхийлөгч шүүгчдийг ямар “шүүлтүүр”-ээр оруулж, сонгож, томилдог вэ. Өмнө нь үндэслэлгүйгээр хөрөнгөжсөн хэрэгт 17 шүүгчийн бүрэн эрхийг түдгэлзүүлэх зарлигийг ганцхан өдөрт л гаргаж байв. Харин энэ удаад ёс зүйгээр умартсан Баянзүрх, Чингэлтэй, Баянзүрх дүүргийн Эрүүгийн хэргийн анхан шатны шүүгч Х.Идэр,  Сүхбаатар дүүргийн Эрүүгийн хэргийн анхан шатны шүүгч З.Болдбаатар, Д.Отгонбаатар нарт ямар хариуцлага хүлээлгэх вэ. Тэдний бусармаг үйлдлийг эсэргүүцэн иргэд өнөөдрөөс Төв талбайд жагсч эхэллээ. Харин Ерөнхийлөгчийн шударга ёсны хэмжүүр юу байх вэ. Харах л үлдлээ.

У.Тэргэл