Монгол Улсын Ерөнхийлөгчийн болон УИХ-ын 28 дугаар тойргийн нөхөн сонгууль удахгүй болно. Энэ жилийн хувьд коронавирусний цар тахлын үед болж байгаагаараа онцлог бөгөөд илүү их ач холбогдол өгөх учиртай болж байна.  Сонгуулийн ерөнхий хороо болоод хэсэг, хороод, дүүрэг, аймаг, нийслэл, улсын хэмжээнд сонгуультай холбоотой ямар үйл явц, ямар шат дараалалтайгаар өрнөх вэ. Энэ талаарх мэдээллийг товчлон хүргэе. 

СОНГУУЛИЙН ХЭСЭГ БАЙГУУЛАХ ЗӨВЛӨМЖИЙГ ХҮРГҮҮЛЖ, ЭХЭЛЖЭЭ

СЕХ-ноос одоогоор аймаг, нийслэл, сум, дүүргийн ИТХ болон Хурлын нарийн бичгийн дарга нарт сонгуулийн хэсэг байгуулахтай холбоотой зөвлөмжийг албан бичгээр хүргүүлж, эхэлжээ. Үүний дараа хэсгийн мэдээллийг үндэслэн сонгогчдын нэрийн жагсаалтыг Улсын бүртгэлийн ерөнхий газар үйлдэх юм.  СЕХ-ны хувьд гуравдугаар сард сонгууль зохион байгуулах үйл ажиллагаанд оролцох, бүх шатны сонгуулийн хороодод ажиллах төрийн албан хаагчдад сургалт зохион байгуулж, гэрчилгээ олгосноор бүх шатны сонгуулийн хороодод ажиллах эрх  үүсэх учиртай.      

ЕРӨНХИЙЛӨГЧИД НЭР ДЭВШҮҮЛЭХ АЖИЛЛАГАА ДӨРӨВДҮГЭЭР САРЫН 30-НААС ТАВДУГААР САРЫН 2-НЫ ХООРОНД ҮРГЭЛЖИЛНЭ  

Сонгуулийн ерөнхий хорооноос Монгол Улсын Ерөнхийлөгчийн сонгуулийн үйл ажиллагааг зохион байгуулах хуваарийг батлаад байгаа ба нам, эвслүүд үүнийг мөрдөнө ажиллана. Тодруулбал, Монгол Улсын Ерөнхийлөгчийн сонгуулийн тухай хуулийн дагуу нэр дэвшүүлэх үйл ажиллагаагаа санал авах өдрөөс 40 хоногийн өмнө буюу дөрөвдүгээр сарын 30-ны өдрөөс эхлүүлж, тавдугаар сарын 2-ны дуусгах юм.

Нэр дэвшүүлэх ажиллагаа дууссаны дараа нам, эвслүүд мөн гурав хоногийн дотор нэр дэвшигчийнхээ баримт бичгийг СЕХ-нд ирүүлэх ба  энэ нь тавдугаар сарын 3,4,5-ны өдрүүдэд таарч байгаа аж. СЕХ нэр дэвшигчдийн баримт бичгийг хүлээж авснаас хойш мөн гурав хоногт буюу тавдугаар сарын 8-ны дотор нэр дэвшигчийг бүртгэх, эсэх асуудлыг шийдвэрлэж, тогтоол гаргана. Ийнхүү тавдугаар сарын 24-ний өдөр нэр дэвшигчдийг нийтэд мэдээлж, үнэмлэх олгох ба ингэснээр сонгуулийн сурталчилгаагаа албан ёсоор эхлүүлэх эрхтэй болж байгаа юм.

ГАДААДАД БУЙ ИРГЭД 20 ХОНОГТ ТУХАЙН УЛСАД СУУГАА ДИПЛОМАТ ТӨЛӨӨЛӨГЧИЙНХӨӨ ГАЗАРТ ХАНДАНА

Энэ жилийн хувьд цар тахалтай холбоотойгоор гадаадад буй иргэдээ олноор нь татан авч буй. Харин тэндээ үлдэн ажиллаж, амьдарч буй монгол иргэдийнхээ саналыг тавдугаар  сарын 30, 31-ний өдрүүдэд авах юм. Гадаад улсад ажиллаж, амьдарч байгаа иргэд дөрөвдүгээр сарын 20-ноос тавдугаар сарын 9-нийг дуустал 20 хоногийн хугацаанд өөрийн байгаа улсад суугаа дипломат төлөөлөгчийн газарт биечлэн очиж, эсвэл шуудан буюу цахим шуудан, факсаар сонгуульд оролцохоо мэдэгдэж, бүртгүүлэх юм байна.

ЕРӨНХИЙЛӨГЧИЙН БОЛОН УИХ-ЫН 28 ДУГААР ТОЙРГИЙН НӨХӨН СОНГУУЛЬ НЭГ ӨДӨР БОЛНО

УИХ-ын тогтоол гарч, УИХ-ын 28 дугаар тойргийн нөхөн сонгуулийн санал авах ажиллагааг Монгол Улсын Ерөнхийлөгчийн сонгуультай нэг өдөр зохион байгуулахаар болсон. Гэхдээ үүнийг хамтад нь явуулж байна гэж ойлгож болохгүй, гагцхүү санал авах өдөр нь л давхцаж байна гэсэн үг юм. Хэдийгээр нэг өдөр зохион байгуулах хэдий ч тус тусдаа эрх зүйн орчинтой, зохицуулалттай тул тухайн хууль журмынхаа дагуу явах юм. Нөгөөтэйгүүр, цар тахлын энэ үед сонгууль явах  учраас сонгогчдын ирцээс гадна халдвар хамгааллын дэглэмийг хэрхэн сахиулахад мөн онцгойлон анхаарч ажиллах болж байна.

У.Тэргэл