Улсын Дээд шүүх өчигдөр намуудаас ирүүлсэн хүсэлтийг хэлэлцжээ. Тодруулбал, Ардчилсан нам, Хөдөлмөрийн Үндэсний нам, Иргэний Зориг Ногоон нам, Шударга Иргэдийн Нэгдсэн Эвсэл намаас ирүүлсэн хүсэлтийг хэлэлцсэн аж. Харин дээрх намуудыг хүсэлтийг хэрхэн шийдвэрлэснийг хүргэж байна.
Ардчилсан намаас ирүүлсэн хүсэлтийг шийдвэрлэлээ
Ардчилсан намын үндсэн дүрэмд оруулсан нэмэлт өөрчлөлт, цахим бүртгэлд С.Эрдэнийн намын даргын бүртгэлийг сэргээлгэх, цахим бүртгэлд Ц.Тувааныг намын даргын үүрэг гүйцэтгэгчээр бүртгүүлэх хүсэлтүүдийг Дээд шүүх 2021 оны 2 дугаар сарын 26-ны өдөр хэлэлцлээ.
Ардчилсан намын үндсэн дүрмийн өөрчлөлтийг бүртгэхээс татгалзсан Улсын Дээд шүүхийн 2021 оны 1 дүгээр сарын 14-ний өдрийн 04 тоот тогтоолд заасан зөрчил арилаагүй үндэслэлээр үндсэн дүрэмд оруулсан нэмэлт өөрчлөлтийг бүртгэхээс, цахим бүртгэлд С.Эрдэнийн намын даргын бүртгэлийг сэргээлгэх, цахим бүртгэлд Ц.Тувааныг намын даргын үүрэг гүйцэтгэгчээр бүртгүүлэхээр ирүүлсэн баримтууд нь Улс төрийн намын тухай хууль, Хуулийн этгээдийн улсын бүртгэлийн тухай хуульд заасан шаардлагыг хангаагүй гэж үзэж, тус тус бүртгэхээс татгалзаж шийдвэрлэв.
Хөдөлмөрийн Үндэсний намын даргаар Т.Доржхандыг бүртгэв
Хөдөлмөрийн Үндэсний намын даргын өөрчлөлтийг бүртгүүлэх тухай хүсэлтийг Дээд шүүх 2021 оны 2 дугаар сарын 26-ны өдөр хянан хэлэлцэв.
Хөдөлмөрийн Үндэсний намын 2021 оны 1 дүгээр сарын 14-ний өдрийн ээлжит 2 дугаар их хурлаас Т.Доржхандыг намын даргаар сонгосон нь Монгол Улсын Үндсэн хууль, Улс төрийн намын тухай хууль болон тухайн намын дүрмийг зөрчөөгүй гэж үзэж, намын даргын өөрчлөлтийг бүртгэлээ.
Иргэний Зориг Ногоон намын хүсэлтийг хэлэлцлээ
Иргэний Зориг Ногоон намын “хуулийн этгээдийн мэдээлэлд оруулсан” өөрчлөлтийг бүртгүүлэх тухай хүсэлтийг Дээд шүүх 2021 оны 2 дугаар сарын 26-ны өдөр хянан хэлэлцэв.
Улсын Дээд шүүх дээрх хүсэлтийг хэлэлцээд баримтууд нь Улс төрийн намын тухай хууль, Хуулийн этгээдийн улсын бүртгэлийн тухай хуулийн шаардлагыг хангаагүй байна гэж үзэж, бүртгэхээс татгалзаж шийдвэрлэлээ.
Шударга Иргэдийн Нэгдсэн Эвсэл намын хүсэлтийг хэлэлцэв
Шударга Иргэдийн Нэгдсэн Эвсэл намын “хуулийн этгээдийн бүртгэлд оруулсан” өөрчлөлтийг бүртгүүлэх тухай хүсэлтийг Дээд шүүх 2021 оны 2 дугаар сарын 26-ны өдөр хянан хэлэлцлээ.
Улсын Дээд шүүх дээрх хүсэлтийг хэлэлцээд баримтууд нь Улс төрийн намын тухай хууль, Хуулийн этгээдийн улсын бүртгэлийн тухай хууль болон уг намын дүрэмд заасан шаардлагыг хангаагүй гэж үзэж, бүртгэхээс татгалзаж шийдвэрлэв.
Б.Баатар
